تراسساداعى ءقاۋىپتى جارىس ۆيدەوسى اقمولا وبلىسى پوليسەيلەرىنە جەتتى. ەكى جۇرگىزۋشى دە تابىلىپ، جازالاندى، دەپ حابارلايدى infohub.kz سايتى.
استانا-پەتروپاۆلوۆسك تاس جولىندا ەكى جۇرگىزۋشىنىڭ ءقاۋىپتى مانەۆرلەرى پوليسيا قىزمەتكەرلەرىنىڭ تەكسەرۋىنە ىلىكتى. جوعارى جىلدامدىقپەن ءبىرىن-بىرى باسىپ وزعان كولىكتەردىڭ ۆيدەوسى الەۋمەتتىك جەلىدە جاريالانىپ، پايدالانۋشىلاردىڭ نارازىلىعىن تۋدىردى.
ءقاۋىپتى ءجۇرىستىڭ كۋاگەرلەرى وقيعانى ۆيدەوعا ءتۇسىرىپ قانا قويماي، جۇرگىزۋشىلەردى جول قوزعالىسى ەرەجەلەرىن ساقتاۋعا شاقىردى. مۇنداي جارىستار قايعىلى سالدارعا اكەلۋى مۇمكىن.
«جاريالانىمنان كەيىن پاترۋلدىك پوليسيا قىزمەتكەرلەرى ەكى بۇزۋشىنىڭ دا جەكە باسىن انىقتادى. ءبىر جۇرگىزۋشى استانادان تابىلدى. ەكىنشىسى پوليسەيلەرمەن كەزدەسۋدەن قاشپاق بولىپ، تەلەفون قوڭىراۋلارىنا جاۋاپ بەرمەدى، الايدا بەينەباقىلاۋ كامەرالارىنىڭ ارقاسىندا ونىڭ كولىگى بۋراباي كۋرورتتىق ايماعىندا انىقتالىپ، سول جەردە ۇستالدى»، — دەپ حابارلادى اقمولا وبلىسى پوليسيا دەپارتامەنتى.
ەكى جۇرگىزۋشىگە دە جول قوزعالىسى ەرەجەلەرىن بۇزعانى ءۇشىن اكىمشىلىك ماتەريالدار جاسالدى. پوليسەيلەرمەن اڭگىمە كەزىندە ەر ادامدار كىناسىن مويىنداپ، بۇدان بىلاي وزدەرى مەن باسقا جول قوزعالىسىنا قاتىسۋشىلاردى قاۋىپ-قاتەرگە ۇشىراتپايتىندارىنا سەندىردى.