امەريكا قۇراما شتاتتارىنىڭ پرەزيدەنتى دونالد ترامپ ۆاشينگتوننىڭ بەلارۋستەن كالي تىڭايتقىشتارىن ساتىپ الۋ تۋرالى «اۋقىمدى مامىلە» جاساسۋعا دايىندالىپ جاتقانىن مالىمدەدى، دەپ حابارلايدى infohub.kz سايتى.
بۇل تۋرالى امەريكاندىق كوشباسشى Truth Social الەۋمەتتىك جەلىسىندە جازدى. ونىڭ ايتۋىنشا، اقش بەلارۋس كالي تىڭايتقىشتارىن جەتكىزۋگە ارنالعان ءىرى كەلىسىمشارت بويىنشا جۇمىس جۇرگىزۋدە.
«امەريكا قۇراما شتاتتارى بەلارۋستەن كالي تىڭايتقىشتارىن ساتىپ الۋ بويىنشا اۋقىمدى مامىلە جاساۋعا دايىندالىپ جاتىر. باعاسى ءبىز ءقازىر كاناداعا تولەپ جاتقان باعادان ايتارلىقتاي تومەن بولادى. بۇل فەرمەرلەرىمىز بەن مال وسىرۋشىلەرىمىز ءۇشىن وتە جاقسى جاڭالىق. وسى ماسەلەگە نازار اۋدارعاندارىڭىزعا راقمەت!» — دەپ جازدى دونالد ترامپ.
بۇعان دەيىن ناۋرىز ايىندا بەلارۋس پرەزيدەنتى الەكساندر لۋكاشەنكو اقش-پەن «ۇلكەن مامىلە» جاساسۋعا دايىندىق تۋرالى مالىمدەگەن بولاتىن. ونىڭ ايتۋىنشا، كەلىسىم «ءبىرقاتار ماسەلەلەردى» قامتيدى.
سونىمەن قاتار، تامىز ايىنىڭ سوڭىندا كانادا پرەمەر-مينيسترى مارك كارني اقش-قا قارسى «دوللارعا دوللار» مولشەرىندە قارسى باج سالىعىن ەنگىزۋ نيەتىن حابارلاعان.
وعان جاۋاپ رەتىندە دونالد ترامپ كانادانىڭ ساياساتىن ءساتسىز دەپ اتادى، ال ەل باسشىلىعىن، سونىڭ ىشىندە پرەمەر-مينيستر مارك كارني مەن ونتاريو پروۆينسياسىنىڭ پرەمەرى داگ فوردتى قۇزىرەتسىز دەپ باعالادى.