اقش پرەزيدەنتى دونالد ترامپ بەلارۋستەن «اۋقىمدى» تىڭايتقىش ساتىپ الۋ كەلىسىمى بويىنشا جۇمىس جۇرگىزىپ جاتقانىن مالىمدەدى. بۇل قادام ساۋدا داۋى ۋشىعىپ تۇرعان كانادادان باس تارتىپ، رەسەيدىڭ وداقتاسىنا بەت بۇرۋدى بىلدىرەدى، دەپ حابارلايدى infohub.kz سايتى.
«امەريكا قۇراما شتاتتارى بەلارۋستەن كالي ساتىپ الۋعا قاتىستى اۋقىمدى كەلىسىم جاساۋ ۇستىندە»، — دەدى ترامپ ءوزىنىڭ Truth Social الەۋمەتتىك جەلىسىندە. «باعاسى ءبىز ءقازىر كاناداعا تولەپ جاتقاننان ايتارلىقتاي تومەن بولادى. بۇل — فەرمەرلەرىمىز بەن مال وسىرۋشىلەرىمىز ءۇشىن وتە جاقسى جاڭالىق».
سوڭعى اپتالاردا ترامپ ۇزاق جىلعى وداقتاس ءارى اقش-تىڭ كاليدىڭ ەڭ ءىرى جەتكىزۋشىسى سانالاتىن كانادامەن ساۋدا سوعىسىن كۇشەيتتى.
دۇيسەنبىدەگى بۇل مالىمدەمە ۆاشينگتوننىڭ مينسكىمەن ديالوگ جۇرگىزۋگە دايىن ەكەنىن كورسەتەدى. الايدا بەلارۋس بيلىگى ديسسيدەنتتەردى قۋدالاپ، رەسەيدىڭ ۋكرايناعا باسىپ كىرۋىن قولداپ وتىر.
اقش كاليدىڭ باسىم بولىگىن سىرتتان اكەلەدى. بۇل حيميالىق تۇز تىڭايتقىش وندىرۋدە قولدانىلادى. 2022 جىلى ۋكرايناداعى سوعىس باستالعاننان كەيىن ونىڭ باعاسى كۇرت ءوستى.
اقش گەولوگيالىق قىزمەتىنىڭ دەرەكتەرىنە قاراعاندا، 2024 جىلى كاليدىڭ 79 پايىزى كانادادان، 11 پايىزى رەسەيدەن، 4 پايىزى بەلارۋستەن جەتكىزىلگەن.
ترامپتىڭ ەكىنشى اكىمشىلىگى كەزىندە ۆاشينگتون بەلارۋسپەن قارىم-قاتىناستى جۇمسارتۋعا ءۇنسىز كىرىستى. وتكەن اپتادا بەلارۋس 25 ساياسي تۇتقىندى بوساتتى، ال اقش ەكى كومپانياعا سالىنعان سانكسيالاردى الىپ تاستادى.
الايدا 1994 جىلدان بەرى بيلىك باسىندا وتىرعان پرەزيدەنت الەكساندر لۋكاشەنكو 2020 جىلعى سايلاۋدان كەيىنگى جاپپاي نارازىلىقتى باسىپ-جانشىعان سوڭ، جۇزدەگەن ادام ءالى دە تۇرمەدە. ودان كەيىن سانكسيالار تولقىنى باستالدى.
2022 جىلى مينسك ماسكەۋگە ءوز اۋماعى ارقىلى ۋكرايناعا باسىپ كىرۋگە رۇقسات بەرگەن سوڭ، باتىس ەلدەرى بەلارۋسكە قايتادان سانكسيالار سالدى.
بەلارۋستىڭ جەر اۋدارىلعان وپپوزيسيا كوشباسشىسى سۆەتلانا تيحانوۆسكايا دۇيسەنبىدە لۋكاشەنكومەن كەز كەلگەن كەلىسىم «وتە ءقاۋىپتى» ەكەنىن ەسكەرتتى.
«ءبىزدىڭ ۇستانىمىمىز — كاليدەن تۇسكەن بارلىق تابىس قۋدالاۋعا جانە رەسەيدىڭ سوعىس ماشيناسىن قولداۋعا كەتىپ جاتقاندا، رەجيممەن ساۋدا جاساۋعا ءالى ەرتە»، — دەدى تيحانوۆسكايا Agence France-Presse اگەنتتىگىنە.
الايدا ول امەريكاندىقتار «لۋكاشەنكونىڭ كىم ەكەنىن بىلەدى» دەپ سەنەتىنىن اتاپ ءوتتى.