اقش پرەزيدەنتى دونالد ترامپ دانيا مەن گرەنلانديامەن كەلىسىمگە قول قويىلعانىن جاريالادى. وعان سايكەس ۆاشينگتون ارال قاۋىپسىزدىگىن تۇراقتى باقىلاۋعا الادى. بۇل تۋرالى اق ءۇي باسشىسى Truth Social الەۋمەتتىك جەلىسىندە جازدى، دەپ حابارلايدى Reuters، infohub.kz سايتىنا سىلتەمە جاساپ.
ترامپتىڭ ايتۋىنشا، كەلىسىم اقش-قا گرەنلانديا اۋماعىندا ارالدى جانە ءوز ۇلتتىق قاۋىپسىزدىگىن قورعاۋ ءۇشىن قاجەت دەپ تاپقان كەز كەلگەن ارەكەتتى مەرزىمسىز جۇزەگە اسىرۋعا مۇمكىندىك بەرەدى.
«اقش گرەنلانديادا ونى قورعاۋ ءۇشىن قاجەتتىنىڭ ءبارىن جاساۋعا ماڭگىلىك تولىق مۇمكىندىك الادى»، — دەدى ترامپ.
امەريكا پرەزيدەنتى اقش قارسىلاس سانايتىن ەلدەر ەندى گرەنلانديادا اسكەري بازا ورنالاستىرا المايتىنىن، وزگە دە اسكەري قاتىسۋىن قۇرا المايتىنىن نەمەسە ۆاشينگتوننىڭ جازباشا رۇقساتىنسىز «سەزىمتال ينۆەستيسيالار» جاساي المايتىنىن دا مالىمدەدى.
ترامپ قول جەتكىزىلگەن ۋاعدالاستىقتى «شەكسىز مەرزىمگە» ارنالعان كەلىسىم دەپ اتادى. ونىڭ سوزىنشە، ول اقش-تان قوسىمشا شىعىن تالاپ ەتپەيدى. ۆاشينگتون ارالدىڭ جەكەلەگەن اۋداندارىندا ايتارلىقتاي اسكەري قاتىسۋ قۇرۋعا كىرىسپەك.
سونىمەن قاتار كەلىسىم گرەنلانديانى اقش-قا بەرۋدى كوزدەمەيدى. ارال دانيا كورولدىگى قۇرامىنداعى اۆتونوميالىق اۋماق بولىپ قالا بەرەدى. بۇعان دەيىن ترامپ گرەنلانديانى اقش-تىڭ تولىق باقىلاۋىنا العىسى كەلەتىنىن بىرنەشە رەت مالىمدەگەن.
پرەزيدەنتتىڭ مالىمدەمەسىنە دەيىن Reuters ۆاشينگتون مەن كوپەنگاگەن ارالداعى امەريكاندىق اسكەري قاتىسۋدى كەڭەيتۋ تۋرالى كەلىسىمگە جاقىنداعانىن حابارلاعان. كەلىسسوزدەر Golden Dome زىمىرانعا قارسى قورعانىس جۇيەسىنىڭ ەلەمەنتتەرىن ىقتيمال ورنالاستىرۋدى جانە ايماقتاعى قىتايدىڭ بەلسەندىلىگىن شەكتەۋدى قوزعادى.
اقش گرەنلانديادا پيتۋففيك عارىش بازاسىن الدەقاشان ورنالاستىرعان. ارالداعى امەريكاندىق اسكەري قاتىسۋ دانيامەن 1951 جىلعى كەلىسىممەن رەتتەلەدى.