اقش پرەزيدەنتى دونالد ترامپ ساسسەكس گەرسوگى حارري مەن گەرسوگينيا مەگاننىڭ ۇلىبريتانياعا قايتا ورالۋىنا قاتىستى پىكىر ءبىلدىرىپ، بۇعان قۋانىشتى ەكەنىن ايتتى. ول سارسەنبى كۇنى ساياحات كومپانيالارىنىڭ وكىلدەرىمەن ءباسپاسوز ءماسليحاتىنان كەيىن جۋرناليستەردىڭ سۇراقتارىنا جاۋاپ بەرۋ كەزىندە: «مەن بۇعان قۋانىشتىمىن»، — دەدى. «مەن ولاردىڭ جانكۇيەرى بولعان ەمەسپىن»، — دەپ قوستى ول.
ترامپ پاتشايىممەن وتە جاقسى قارىم-قاتىناستا بولعانىن، ونى جاقسى بىلەتىنىن ايتتى. «مەن پاتشا چارلزبەن دە وتە جاقسى قارىم-قاتىناستا بولدىم — ونى حانزادا چارلز كەزىنەن بىلەمىن، ۇزاق ۋاقىت بويى تانىسپىن»، — دەدى ول. ترامپ ءچارلزدى «وتە جاقسى ادام» دەپ سيپاتتاپ، حارري مەن مەگان كورولدىك وتباسىنا «ۇلكەن قۇرمەتسىزدىك» كورسەتتى دەپ ەسەپتەيتىنىن جەتكىزدى. «ماعان بۇل ۇنامادى»، — دەدى ول، ءارى «مەن كورولدىك وتباسىنىڭ ورنىندا بولسام، ولاردى قايتا قابىلداماس ەدىم»، — دەپ قوستى.
ەسكە سالايىق، حارري مەن مەگان وتكەن اپتادا ۇلىبريتانياعا ورالدى. ولار التى جىل بۇرىن اقش-قا كوشىپ كەتكەن ەدى، 2020 جىلدان بەرى كاليفورنيادا تۇردى. جۇپ ازىرگە ءوز جوسپارلارى تۋرالى رەسمي مالىمدەمە جاساعان جوق، ءبىراق ولاردىڭ «ۇزاق ۋاقىتقا» قالۋى كۇتىلۋدە. ولاردىڭ قانشا ۋاقىت تۇراتىنى جانە قايدا تۇراتىنى تۋرالى ءارتۇرلى بولجامدار ايتىلۋدا.
ترامپ كورولدىك وتباسىنا دەگەن قىزىعۋشىلىعى مەن تاڭدانىسىن بالالىق شاعىنداعى ەستەلىكپەن بايلانىستىرادى. ول 1953 جىلى اناسى مەري ەنن ترامپپەن بىرگە پاتشايىم ەليزاۆەتا IIء-نىڭ ءتاج كيگىزۋ ءراسىمىن تەلەديداردان كورگەنىن ايتادى. ترامپ قايتىس بولعان پاتشايىمدى « ۇلى ايەل» دەپ اتاپ، ونىڭ تاقتا وتىرعان ونداعان جىلدارى «ەشقاشان قاتەلىك جاساماعانىن» اتاپ ءوتتى.
حابارلارعا سايكەس، كورول چارلز گەرسوگ پەن گەرسوگينيامەن جەكە دەڭگەيدە كوبىرەك ۋاقىت وتكىزۋدى اسىعا كۇتۋدە. الايدا 41 جاستاعى حارري مەن 45 جاستاعى مەگان جەكە تۇلعالار بولىپ قالا بەرەدى. ولار بۇعان دەيىن رەسمي كورولدىك مىندەتتەرىنەن باس تارتقان بولاتىن. جۇپقا «جارتىلاي-جارتىلاي» نۇسقاسى ۇسىنىلمايدى دەپ كۇتىلۋدە، بۇل وپسيانى پاتشايىم ەليزاۆەتا II بۇرىن قاتاڭ تۇردە قابىلداماعان ەدى.
بريتاندىق سالىق تولەۋشىلەر ولاردىڭ قاۋىپسىزدىگىن قامتاماسىز ەتۋ شىعىندارىن كوتەرەتىنى تۋرالى سۇراقتار ءالى دە جاۋاپسىز تۇر.