امەريكا قۇراما شتاتتارىنىڭ پرەزيدەنتى دونالد ترامپ تاراپتار كەلىسىمگە كەلە الماي، قۇجاتقا قول قويىلماسا، يرانعا اۋە سوققىسىن بەرۋگە دايىن ەكەنىن مالىمدەدى. بۇل تۋرالى اق ءۇي باسشىسى ءباسپاسوز ءماسليحاتىندا ايتتى، دەپ حابارلايدى infohub.kz سايتى.
امەريكا كوشباسشىسىنىڭ ايتۋىنشا، يران ماسەلەسى بويىنشا شەشىم قابىلدايتىن ۋاقىت الىستاپ بارادى. «مۇمكىن، ءبىز ولاردى بومبالايمىز. ءبىز بۇل شەشىمدى قابىلداۋىمىز كەرەك. ءبىز ولاردى بومبالايمىز نەمەسە كەلىسىم جاسايمىز. ۋاقىت جاقىنداپ كەلەدى. قالاي بولعاندا دا، بۇل وتە جاقىن ارادا اياقتالادى»، — دەپ كەلتىرەدى ترامپتىڭ ءسوزىن ريا نوۆوستي.
ايتا كەتەيىك، اقش پرەزيدەنتى امەريكا كۇشتەرىنىڭ يرانعا سوققى بەرۋىن قايتا باستاۋ مۇمكىندىگىن جوققا شىعارمادى جانە مۇنداي نۇسقانى ءاردايىم ويلاستىراتىنىن اتاپ ءوتتى.
بۇعان دەيىن دونالد ترامپ يرانمەن سوعىس «وتە جاقىن ارادا» اياقتالاتىنىن مالىمدەگەن ەدى. ونىڭ ايتۋىنشا، يسلام رەسپۋبليكاسى اۋىر جەڭىلىسكە ۇشىرايدى.
ودان بۇرىن يراننىڭ سىرتقى ىستەر ءمينيسترى ابباس اراكچي تەگەران كەلىسسوزدەرگە دە، اقش-پەن جاڭا اسكەري قاقتىعىسقا دا دايىن ەكەنىن حابارلاعان. الايدا قارساڭىندا بۇقارالىق اقپارات قۇرالدارىندا كاتار وكىلدەرى وسى اپتادا اقش پەن يران اراسىنداعى قاقتىعىستى رەتتەۋدە ىلگەرىلەۋگە قول جەتكىزە الماعانى تۋرالى مالىمەتتەر پايدا بولدى — كەلىسسوزدەر تۇيىققا تىرەلدى.
سول ۋاقىتتا يراننىڭ يسلام رەۆوليۋسياسىنىڭ ساقشىلار كورپۋسى (يرسك) اقش تاراپىنان جاڭا اسكەري اگرەسسيا بولعان جاعدايدا جاڭا قارۋ قولدانۋعا دايىن ەكەنىن مالىمدەدى.