اقش پرەزيدەنتى دونالد ترامپ يرانعا قارسى جاڭا اۋقىمدى اسكەري شابۋىل جاساۋ مۇمكىندىگىن قاراستىرىپ جاتقانىن مالىمدەپ، جاقىن ارادا قاقتىعىستى اياقتاۋ تۋرالى ماڭىزدى شەشىم جاريالايتىنىن ۋادە ەتتى، دەپ حابارلايدى infohub.kz سايتى.
امەريكا كوشباسشىسىنىڭ ايتۋىنشا، ۆاشينگتون ءارى قارايعى ارەكەتتەر تۋرالى شەشۋشى قادام جاساۋعا ءتيىس. ول بۇل تۋرالى Axios باسىلىمىنا بەرگەن سۇحباتىندا ايتتى.
«مەن ماڭىزدى شەشىم قابىلداۋىم كەرەك. باسىپ كىرىپ، ولاردى (يران رەجيمىن) جويۋدى قالايمىن با، جوق پا؟ بۇل ماڭىزدى شەشىم. مەنىڭ باسىما نە بولارىن ەشكىم بىلمەيدى»، – دەدى ترامپ.
بۇعان دەيىن ترامپ سوعىس جاقىن ارادا اياقتالۋى مۇمكىن ەكەنىن ايتقان. ول كەلىسىمگە تەز جەتۋگە ۇمىتتەنەتىنىن ءبىلدىرىپ، تەگەران بەيبىت كەلىسىمگە مۇددەلى دەپ ەسەپتەيتىنىن جەتكىزدى. الايدا اقش پرەزيدەنتى مامىلەنىڭ ىقتيمال شارتتارىن اشپادى جانە كەلىسسوزدەردىڭ قاي كەزەڭدە تۇرعانىن حابارلامادى.
سونىمەن قاتار ترامپ يرانمەن قاقتىعىستا اقش-تى قولداماعان ەلدەردەن ۆاشينگتونعا كەلتىرىلگەن شىعىندى وتەۋدى تالاپ ەتتى. ونىڭ سوزىنشە، امەريكاعا كومەكتەسۋدەن باس تارتقان مەملەكەتتەر سوعىس اياقتالعان سوڭ «ەسەپ ايىرىسۋعا» ءماجبۇر بولادى.
بۇعان دەيىن ترامپ قاقتىعىستىڭ جاقىن ارادا ءبىتۋى مۇمكىن ەكەنىن ايتقانىمەن، بەيبىت كەلىسىمنىڭ ناقتى مەرزىمى مەن شارتتارىن اتاماعان.
وسى ۋاقىتتا يران دەلدالدار ارقىلى اقش-قا ورمۋز بۇعازىن اشۋ ءۇشىن جەتى شارت جىبەردى. تەگەراننىڭ تالاپتارى قاتارىندا اسكەري قاۋىپ-قاتەرلەردى توقتاتۋ، تەڭىز بلوكاداسى مەن سانكسيالاردى الۋ، اكتيۆتەردى بوساتۋ، شىعىندى وتەۋ جانە كەمە قاتىناسىنىڭ قاۋىپسىزدىگىنە كەپىلدىك بەرۋ بار. ۆاشينگتوننىڭ اشۋدى تالاپ ەتۋىنە قاراماستان، بۇعازدىڭ وڭتۇستىك باعىتى جابىق كۇيىندە قالىپ وتىر. يران مەن ومان جاڭا باعىتتاردىڭ بولشەكتەرى تۋرالى كەلىستى.