اقش پرەزيدەنتى دونالد ترامپ يرانمەن كەلىسسوزدەردە پروگرەسكە قول جەتكىزىلگەن-جەتپەگەنى الداعى بىر-ەكى كۇندە بەلگىلى بولاتىنىن مالىمدەدى، دەپ حابارلايدى infohub.kz سايتى.
Times of India باسىلىمىنىڭ حابارلاۋىنشا، جۋرناليستەرگە سويلەگەن ترامپ يرانمەن كەلىسسوزدەر «وتە جاقسى ءوتىپ جاتقانىن» اتاپ ءوتتى. ول سونداي-اق سەرپىلىس بۇگىن نەمەسە ەرتەڭ بولۋى مۇمكىن ەكەنىن جەتكىزدى. «ءبىز 48 ساعات ىشىندە بىلەمىز»، — دەدى امەريكاندىق كوشباسشى.
بۇل مالىمدەمە ترامپتىڭ Fox News ارناسىنا ەكى تاراپتىڭ كۇنى بويى سوزىلعان كەلىسسوزدەر جۇرگىزگەنىن ايتقانىنان كەيىن جاسالدى. اقش پرەزيدەنتى تالقىلاۋ بارىسىن وڭ باعالاپ، ەگەر كەلىسىمگە قول جەتكىزىلمەسە، يراندى «وتە كۇشتى سوققى» كۇتۋى مۇمكىن ەكەنىن ەسكەرتتى.
سۇحباتتا ترامپ كەلىسسوزدەردى ورمۋز بۇعازىنىڭ جۇمىسىن قالپىنا كەلتىرۋمەن تىكەلەي بايلانىستىردى. «بۇعاز جاقىن ارادا اشىلادى، ايتپەسە ولار قاتتى زارداپ شەگەدى، سودان كەيىن بۇعاز اشىلادى»، — دەدى اق ءۇيدىڭ باسشىسى.
ەسكە سالايىق، بۇعان دەيىن دونالد ترامپ يرانمەن قازىرگى كەلىسسوزدەر ولار ءۇشىن كەلىسىمگە قول قويۋدىڭ «سوڭعى مۇمكىندىگى» ەكەنىن مالىمدەگەن بولاتىن. سونداي-اق اقش پرەزيدەنتى يراننىڭ ەشقاشان يادرولىق قارۋعا يە بولمايتىنىن ايتىپ، ەگەر ورمۋز بۇعازى اشىلماسا، جاڭا سوققىلار جاسايتىنىن ەسكەرتتى.
وعان دەيىن ترامپ يرانعا شابۋىلدى توقتاتىپ، ۆاشينگتون مەن تەگەران اراسىنداعى كەلىسسوزدەردى جاريالاعان ەدى. ول تاياۋ شىعىس ەلدەرىنىڭ ءوتىنىشى بويىنشا يرانعا سوققىلاردى توقتاتۋ تۋرالى بۇيرىق بەرگەنىن جانە ورمۋزعا قاتىستى جاڭا كەلىسىمنىڭ مۇمكىندىگىن ايتقان.