اقش پرەزيدەنتى دونالد ترامپ يراننىڭ جەتى كۇندىك اتىستى توقتاتۋ باستاماسىن اشىق تۇردە قابىلدامادى. الايدا ۆاشينگتوننىڭ تەگەرانعا دەلدالدار ارقىلى بەرەتىن تۇپكىلىكتى جاۋابى ازىرگە جەتكىزىلگەن جوق، دەپ حابارلايدى infohub.kz سايتى.
ربك اگەنتتىگىنىڭ مالىمەتىنشە، اقش كوشباسشىسى يراننىڭ جەتى كۇنگە سوعىس قيمىلدارىن توقتاتىپ، ورمۋز بۇعازى ارقىلى كەمە قاتىناسىن قايتا باستاۋ جوسپارىنان باس تارتقانىن راستادى.
«مەن ولاردىڭ مامىلەسىنەن باس تارتامىن. ولار ورمۋز بۇعازىن دەرەۋ اشاتىن مامىلە جاساعىسى كەلەدى، ويتكەنى ولار كۇيرەتە جەڭىلىس تاۋىپ وتىر. (...) ولار مامىلە جاساعىسى كەلەدى. مەنىڭشە، بۇل قالىپتى جاعداي. مەن دە مامىلە جاساسۋدى ۇناتامىن. ءبىراق بۇل مامىلە قابىلدانبايتىن ەدى»، — دەدى اق ءۇي باسشىسى وڭتۇستىك كوگالدا جۋرناليستەردىڭ سۇراقتارىنا جاۋاپ بەرىپ.
سونىمەن قاتار ريا ءنوۆوستيدىڭ دەرەگىنشە، يران دەلدالداردان اقش-تىڭ جەتى كۇندىك جوسپارعا قاتىستى تۇپكىلىكتى جاۋابىن ءالى العان جوق.
«ءبىز اقش پرەزيدەنتىنىڭ العاشقى رەاكسياسىن كوردىك، الايدا دەلدالدار ارقىلى بىزگە ەشتەڭە جەتكىزىلگەن جوق»، — دەدى يراننىڭ سىرتقى ىستەر ءمينيسترى ابباس اراكچي يراندىق باق-قا.
يراندىق مينيستر اقش پرەزيدەنتى كوپتەگەن قاراما-قايشى مالىمدەمە جاسايتىنىن قوستى.
«ءبىز دەلدالداردىڭ تۇپكىلىكتى ۇستانىمىن كۇتەمىز، سونىڭ نەگىزىندە شەشىم قابىلدايمىز»، — دەپ تولىقتىردى اراكچي.
ول ورمۋز بۇعازىن اشۋ ماسەلەسىندەگى كەز كەلگەن ىلگەرىلەۋ اقش-تىڭ يران قويعان شارتتاردى ورىنداۋىنا بايلانىستى ەكەنىن مالىمدەدى.
ەسكە سالايىق، بۇعان دەيىن يران دەلدالدار ارقىلى ترامپ اكىمشىلىگىنە ورمۋز بۇعازىن ءبىر اپتاعا اشۋدى ۇسىنعان بولاتىن. ۋاقىتشا اتىستى توقتاتۋ جوسپارى بۇۇ باس اسسامبلەياسىنىڭ الاڭىندا تانىستىرىلعان ەدى.