اقش پرەزيدەنتى دونالد ترامپ يراننىڭ ازاماتتىق ينفراقۇرىلىمىنا سوققى بەرەتىنىن ەسكەرتتى. ەگەر تەھران كۇشتەرى ورمۋز بۇعازىنداعى كەمەلەرگە وق جاۋدىرسا، اسكەريلەر كوپىرلەر مەن ەلەكتر ستانسيالارىن بومبالايدى، دەپ حابارلايدى infohub.kz سايتى.
سارسەنبى كۇنى جاسالعان بۇل ەسكەرتۋ ءىس جۇزىندە اسىرىلسا، ءقازىردىڭ وزىندە ايماققا جايىلعان قاقتىعىستىڭ ودان ءارى ۋشىعۋىنا اكەلەدى. ترامپ الەۋمەتتىك جەلىدەگى جازباسىندا: «بۇدان بىلاي يران يسلام رەسپۋبليكاسى ورمۋز بۇعازىنداعى كەمەگە زىمىران، راكەتا، ۇشقىشسىز ۇشاق نەمەسە كەز كەلگەن باسقا قۇرىلعىمەن وق اتقان سايىن، امەريكا قۇراما شتاتتارى استانا تەھرانداعى نەمەسە ونىڭ ماڭىنداعى ءبىر كوپىر نەمەسە ەلەكتر ستانسياسىن بومبالاپ، جويادى»، – دەدى.
بۇعان دەيىن دە ترامپ يراننىڭ كوپىرلەرى مەن ەلەكتر ستانسيالارىن بومبالايتىنىن، ءتىپتى ەلدىڭ وركەنيەتىن جويۋ ءقاۋپىن ايتقان ەدى. الايدا سارسەنبىدەگى مالىمدەمە بۇرىنعىلارعا قاراعاندا ناقتىراق. يراننىڭ جارتىلاي رەسمي «تاسنيم» اگەنتتىگى يراندىق اسكەري دەرەككوزگە سىلتەمە جاساپ، ەگەر ەلدىڭ ينفراقۇرىلىمىنا شابۋىل جاسالسا، تەھراننىڭ ءدال وسىنداي جاۋاپ قايتاراتىنىن حابارلادى. دەرەككوز: «ەگەر امەريكالىقتار يرانداعى كوپىر نەمەسە ەلەكتر ستانسياسىن نىساناعا السا، يران ايماقتاعى ينفراقۇرىلىمدارعا، سونىڭ ىشىندە اقش مۇددەسى بار ەنەرگەتيكالىق نىساندارعا سوققى بەرەدى»، – دەپ مالىمدەگەن.
اقش پەن يران اراسىنداعى شابۋىلدار سوڭعى 12 كۇن بويى جالعاسۋدا. تاراپتار اراسىنداعى سوعىستى توقتاتۋى ءتيىس ءوزارا تۇسىنىستىك تۋرالى حاتتاما (MoU) ورمۋز بۇعازىنىڭ تاعدىرىنا بايلانىستى ىسكە اسپاي قالدى. يران ستراتەگيالىق سۋ جولىنا ءوزىنىڭ ەگەمەندىگىن تالاپ ەتىپ، MoU بۇعازدى باسقارۋعا وكىلەتتىك بەرەتىنىن ايتادى. ال ترامپ اكىمشىلىگى ورمۋزدىڭ سوعىسقا دەيىنگى حالىقارالىق ەركىن وتكەل مارتەبەسىنە قايتارىلۋىن تالاپ ەتۋدە.
ومان جاعالاۋىنداعى بۇعازدان يرانمەن كەلىسپەي وتكەن كەمەلەرگە شابۋىل جاسالعاننان كەيىن قاقتىعىس قايتا جانداندى. اقش اسكەري كۇشتەرى يرانداعى اسكەري نىساندارمەن قاتار ازاماتتىق پورتتار مەن كوپىرلەرگە دە سوققى بەرىپ، ونداعان ادامدى ءولتىردى. تەھران ايماقتاعى اقش اسكەرلەرى ورنالاسقان بازالارعا زىمىران مەن راكەتا جاۋدىرىپ جاۋاپ قايتاردى. يراندىق شابۋىلداردان يوردانيا مەن يراكتا كەمىندە ءتورت اسكەري قىزمەتكەر قازا تاۋىپ، تاعى بىرنەشەۋى جارالاندى. سەيسەنبى كۇنى كەشكە پەنتاگون 28 جاستاعى ەنجەل رامپەرسادتىڭ يوردانياداعى يراندىق زىمىران سوققىسىنان قازا تاپقان ءۇشىنشى ادام ەكەنىن انىقتادى.
ترامپ سارسەنبى كۇنى دەلاۆەر شتاتىنداعى دوۋۆ اۋە بازاسىندا قازا تاپقان اسكەريلەردىڭ دەنەلەرىن قارسى الۋعا قاتىسادى. ول اقش اسكەرلەرىن ولتىرگەنى ءۇشىن يران «ۇلكەن تولەم تولەيتىنىن» ايتىپ: «ولار جويىلىپ جاتىر»، – دەگەن. سوعىستىڭ قايتا باستالۋى مۇناي باعاسىنىڭ قايتا كوتەرىلۋىنە سەبەپ بولدى. اقش-تا ءبىر گاللون (3،4 ليتر) بەنزيننىڭ ورتاشا باعاسى 4 دوللاردان استى، بۇعان دەيىن ءبىتىم كەزىندە ول 3،80 دوللار شاماسىندا بولعان ەدى.