اقش پرەزيدەنتى دونالد ترامپ يرانعا جاسالاتىن اۋقىمدى اسكەري شابۋىلدى توقتاتقانىن جانە «كەلىسىم شارتتارى» كەلىسىلگەنىن مالىمدەدى. بۇل تۋرالى ول سەنبى كۇنى كەشكە Truth Social پلاتفورماسىندا جازدى. بۇعان دەيىن امەريكالىق ب ا ق ۆاشينگتون مەن يزرايل يراننىڭ ەنەرگەتيكالىق ينفراقۇرىلىمىنا سوققى بەرۋگە دايىندالىپ جاتقانىن حابارلاعان ەدى.
ترامپتىڭ ايتۋىنشا، بۇل شەشىم يران مەن تاياۋ شىعىستاعى باسقا ەلدەردىڭ «كەلىسىم شارتتارى كەلىسىلگەندىكتەن شابۋىلدى توقتاتۋ» وتىنىشىنە جاۋاپ رەتىندە قابىلدانعان. ول كەلىسىمنىڭ تەز ارادا جاسالۋى شارتىمەن كەلىسكەن.
ول كەلىسىم «ورمۋز بۇعازىنىڭ دەرەۋ، تولىق جانە تۇپكىلىكتى اشىلۋىنا» اكەلەتىنىن جانە يراننىڭ «يادرولىق قاۋپىنە» نۇكتە قوياتىنىن ايتتى. تەگەران تاراپىنان بۇعان ازىرگە رەسمي جاۋاپ جوق.
سەنبى كۇنى تاڭەرتەڭ يران سىرتقى ىستەر ءمينيسترى ابباس اراگچي ساۋد ارابياسىنداعى ارىپتەسىنە اقش پەن ءيزرايلدىڭ كەز كەلگەن شابۋىلىنا «لايىقتى جاۋاپ» بەرىلەتىنىن ايتقان. امەريكاندىق Axios سايتىنىڭ حابارلاۋىنشا، ساۋد ارابياسىنىڭ تاق مۇراگەرى مۇحاممەد بين سالمان سەنبى كۇنى ترامپقا قوڭىراۋ شالىپ، سوققىنى توقتاتىپ، كەلىسسوزدەرگە ورالۋدى وتىنگەن. بۇل تۋرالى ماسەلەدەن حاباردار دەرەككوزگە سىلتەمە جاساپ، سايت جازدى.
ترامپ جۇما كۇنى اقش يرانعا «قاتتى سوققى» بەرەتىنىن ايتقان بولاتىن. سەنبى كۇنى اقش مەملەكەتتىك دەپارتامەنتى ايماقتاعى 10 ەلدەگى امەريكالىقتارعا قاۋىپسىزدىك ەسكەرتۋلەرىن جاريالاپ، شيەلەنىستىڭ ارتۋىنا بايلانىستى ساقتىق شارالارىن كۇشەيتۋگە جانە ەلدەن كەتۋدى قاراستىرۋعا شاقىردى.