اقش پرەزيدەنتى دونالد ترامپ سولتۇستىك كورەيا كوشباسشىسى كيم چەن ىنمەن بيىل كۇزدە قىتايدىڭ شەنچجەن قالاسىندا كەزدەسۋدى جوسپارلاپ وتىر، دەپ حابارلايدى infohub.kz سايتى.
DW The Wall Street Journal-گە سىلتەمە جاساپ حابارلاعانداي، امەريكاندىق شەنەۋنىكتەردىڭ دەرەككوزدەرى كەزدەسۋ قاراشا ايىندا ازيا-تىنىق مۇحيتى ەكونوميكالىق ىنتىماقتاستىعى ءسامميتى وتەتىن شەنچجەندە ءوتۋى مۇمكىن ەكەنىن ايتقان. دەگەنمەن، كەزدەسۋدىڭ رەسمي دايىندىعى ازىرگە باستالعان جوق.
شەنەۋنىكتەردىڭ پىكىرىنشە، ترامپ كيم چەن ىنمەن پحەنياننىڭ يادرولىق باعدارلاماسى بويىنشا كەلىسسوزدەردى قايتا جانداندىرۋدى تالقىلاۋدى جوسپارلاپ وتىر.
ولار دونالد ترامپ ءبىرىنشى پرەزيدەنتتىك مەرزىمىندە سولتۇستىككورەيالىق كوشباسشىمەن ءۇش رەت كەزدەسكەنىن، الايدا سول كەزدە كحدر-دىڭ يادرولىق ينفراقۇرىلىمىن بولشەكتەۋ تۋرالى كەلىسسوزدەر تۇيىققا تىرەلگەنىن ايتتى. ەسكە سالايىق، بۇعان دەيىن اقش پرەزيدەنتى كحدر باسشىسى ونىڭ ەكى ەل اراسىنداعى كەلىسسوزدەر وتكىزۋ تۋرالى ۇندەۋىنە جاۋاپ بەرگەنىن مالىمدەگەن.
ال ودان بۇرىن دونالد ترامپ كيم چەن ىنمەن جاقسى قارىم-قاتىناسىن ماقتان ەتىپ، الەۋمەتتىك جەلىدە بىرلەسكەن فوتوسىن جاريالاعان. سونداي-اق، ول كيم چەن ىنمەن "جاقسى قارىم-قاتىناسىنا" بايلانىستى پەنتاگونعا اقش پەن وڭتۇستىك كورەيانىڭ بىرلەسكەن وقۋ-جاتتىعۋلارىنىڭ اۋقىمىن قىسقارتۋدى تاپسىرعان.
سولتۇستىك كورەيامەن كەلىسسوزدەردى تالقىلاۋ تۋرالى مالىمدەمەدەن كەيىن ترامپ ەل باسشىسى كيم چەن ىنمەن مەم جاريالاعان.