اقش پرەزيدەنتى دونالد ترامپ زەلەنسكيمەن سويلەسكەن سوڭ بىردەن اق ۇيدە يزرايل پرەمەر-مينيسترى بينيامين نەتانياحۋمەن كەزدەستى، دەپ حابارلايدى infohub.kz.
يزرايل پرەمەر-مينيسترىنىڭ رەسمي ءورىستىلدى Telegram ارناسى كەزدەسۋدىڭ سۋرەتىن جاريالادى. «ءقازىر اق ۇيدە دوسىم، اقش پرەزيدەنتى دونالد ترامپپەن كەزدەسىپ وتىرمىن»، — دەلىنگەن حابارلامادا.
CNN تەلەارناسىنىڭ مالىمەتىنشە، يزرايل پرەمەر-مينيسترى شىعىس ۋاقىتى بويىنشا ساعات 11:03-تە باستالعان كەزدەسۋدەن كەيىن اق ءۇيدى 12:25-تە تاستاپ كەتتى. اق ءۇيدىڭ ءباسپاسوز حاتشىسى كەرولاين لەۆيتت X الەۋمەتتىك جەلىسىندە بىلاي دەپ جازدى: «پرەزيدەنت ترامپ وۆال كابينەتىندە زەلەنسكي پرەزيدەنتىمەن جانە نەتانياحۋ پرەمەر-مينيسترىمەن كەزدەسۋلەرىن اياقتادى. ەكى كەزدەسۋ دە وڭدى ءارى ناتيجەلى ءوتتى!»
زەلەنسكيمەن كەزدەسۋ سياقتى، نەتانياحۋمەن اڭگىمە دە ءباسپاسوز قاتىسۋىنسىز ءوتتى.
بۇعان دەيىن يزرايلدىك ب ا ق نەتانياحۋدىڭ اقش تالاپتارىنا قاراماستان يزرايل قورعانىس اسكەرى (ساحال) بولىمشەلەرىن گازادا، سيريادا جانە ليۆاندا قالدىرۋ نيەتىن بىلدىرگەنىن حابارلادى. وتكەن اپتادا CNN نەتانياحۋدىڭ بىرنەشە اپتا بويى ترامپپەن كەزدەسۋگە قول جەتكىزە الماعانىن حابارلادى. يزرايل پرەمەرىنىڭ ءوزى امەريكالىق كوشباسشىمەن كەلىسپەۋشىلىكتەرىن مويىنداپ، بۇرىن يزرايل ەكونوميكاسى كۇشتى جانە اقش-تىڭ قارجىلىق كومەگىنە مۇقتاج ەمەس ەكەنىن ايتقان.
ترامپ اكىمشىلىگىندەگى دەرەككوزدەردىڭ حابارلاۋىنشا، تەلەفون ارقىلى سويلەسۋلەردىڭ بىرىندە ترامپ نەتانياحۋعا قاراتىپ بىلاپىت سوزدەر ايتىپ، وعان كوپجىلدىق سوت پروسەسىن ەسكە سالعان.