اقش پرەزيدەنتى دونالد ترامپ امەريكالىق شەنەۋنىكتەرگە نلو تۋرالى اقپاراتتى جاريالاۋعا شەكتەۋلەردى الىپ تاستاۋدى تاپسىردى، دەپ حابارلايدى infohub.kz.
Fox News Digital ءوز دەرەككوزدەرىنە سىلتەمە جاساپ حابارلاعانداي، اقش پرەزيدەنتى دونالد ترامپ فەدەرالدى مەكەمەلەرگە انىقتالماعان انومالدى قۇبىلىستاردى تەرگەۋگە قاتىسقان بۇرىنعى مەملەكەتتىك قىزمەتكەرلەر مەن مەردىگەرلەرمەن جاسالعان قۇپيالىلىق كەلىسىمدەرىن (NDA) جويۋدى تاپسىردى.
«پرەزيدەنت ترامپ جاقىندا قورعانىس مينيسترلىگى مەن بارلاۋ قاۋىمداستىعىنا ءتيىستى اقپاراتى بار بۇرىنعى مەملەكەتتىك قىزمەتكەرلەرگە نەمەسە مەردىگەرلەرگە ۇكىمەتتىڭ ارنايى وكىلدەرىمەن كەزدەسۋگە بارىپ، بۇرىن جاسالعان قۇپيالىلىق كەلىسىمدەرىن بۇزۋعا رۇقسات بەرۋدى تاپسىردى»، — دەدى اكىمشىلىكتىڭ جوعارى لاۋازىمدى شەنەۋنىگى.
ۇكىمەت تاراپىنان كەزدەسۋلەرگە پەنتاگوننىڭ نلو جانە باسقا دا انىقتالماعان انومالدى قۇبىلىستاردى تەرگەۋ ءۇشىن قۇرعان بارلىق سالالارداعى انوماليالاردى شەشۋ باسقارماسىنىڭ (AARO) وكىلدەرى قاتىسادى دەپ حابارلاندى.
شەنەۋنىكتەردىڭ ايتۋىنشا، كونگرەستىڭ كوپجىلدىق تەرگەۋلەرى، اقپارات بەرۋشىلەردىڭ مالىمدەمەلەرى جانە جاقىندا جاريالانعان قۇجاتتار كەيبىر تەرگەۋگە قاتىسۋشىلاردىڭ بۇرىن جاسالعان قۇپيالىلىق كەلىسىمدەرى ۇكىمەت تەرگەۋلەرى اياسىندا كۋالىك بەرۋگە مۇمكىندىك بەرمەيدى دەپ ەسەپتەپ، تولىق ەمەس اقپارات بەرگەن بولۋى مۇمكىن دەگەن سۇراقتار تۋىنداتتى.
ەسكە سالايىق، مامىر ايىندا پەنتاگون نلو جانە انومالدى قۇبىلىستار تۋرالى قۇپيا فايلدارعا قول جەتكىزۋدى اشتى. اقپارات بىرنەشە كەزەڭمەن جاريالاناتىنى حابارلاندى. بۇرىن قۇپيا بولعان ماتەريالداردىڭ ءبىر بولىگى ماۋسىم ايىندا دا جاريالاندى.