امەريكا قۇراما شتاتتارىنىڭ پرەزيدەنتى دونالد ترامپ ۋكراينادا بەيبىتشىلىك ورناتۋ ءۇشىن رەسەيگە قارسى اۋقىمدى سانكسيالار تۋرالى زاڭدى ىسكە قوسۋى مۇمكىن ەكەنىن جوققا شىعارمادى، دەپ حابارلايدى infohub.kz سايتى.
امەريكا كوشباسشىسى رەسەيگە قارسى سانكسيالىق زاڭدى قولدانۋ مۇمكىندىگى تۋرالى بىرىككەن ۇلتتار ۇيىمى باس اسسامبلەياسىنىڭ تريبۋناسىنان مالىمدەدى.
«وتكەن اپتادا سەناتور ليندسي گرەمنىڭ قۇرمەتىنە كونگرەسس قابىلداعان قۋاتتى جاڭا زاڭعا قول قويدىم. بۇل زاڭ ماعان زور جاڭا تاريفتىك وكىلەتتىكتەر بەرەدى. قاجەت بولسا، مەن ولاردى پايدالانۋعا تۋرا كەلەدى»، — دەدى ول.
ايتا كەتەيىك، «توزاق سانكسيالارى» تۋرالى زاڭ جوباسىنا ترامپ 19 قىركۇيەككە قاراعان ءتۇنى قول قويدى. قۇجات رەسەيگە، سونداي-اق ونىڭ ەنەرگورەسۋرستارىن ءىرى كولەمدە ساتىپ الۋشىلارعا قارسى سانكسيالار مەن باجداردى كوزدەيدى.
ول رەسەيلىك مۇناي مەن گازدى ساتىپ الاتىن ەلدەرگە قارسى قايتالاما ساۋدا شارالارىن ۇسىنادى: اقش-قا اكەلىنەتىن رەسەيلىك تاۋارلارعا 500%-عا دەيىنگى باج، ال رەسەيلىك مۇناي نەمەسە گاز ساتىپ الاتىن ەلدەردىڭ تاۋارلارىنا 100%-عا دەيىنگى باج.
ەسكە سالايىق، بۇعان دەيىن رەسەي فەدەراسياسى پرەزيدەنتىنىڭ ءباسپاسوز حاتشىسى دميتري پەسكوۆ اقش-تىڭ رەسەيگە قارسى سانكسيالار تۋرالى زاڭ جوباسىن دوستىققا جاتپايتىن قادام دەپ اتاپ، ولاردىڭ ەنگىزىلۋى ۋكراينادا بەيبىت رەتتەۋ جولدارىن ىزدەۋ كۇش-جىگەرىن قيىنداتۋى مۇمكىن ەكەنىن مالىمدەدى.