اقش پرەزيدەنتى دونالد ترامپ ساۋد ارابياسىمەن 30 جىلعا ەسەپتەلگەن يادرولىق كەلىسىمدى ماقۇلدادى. كەلىسىمنىڭ قۇنى ونداعان ميلليارد دوللارعا باعالانۋدا، دەپ حابارلايدى infohub.kz سايتى.
The Wall Street Journal باسىلىمى ترامپ اكىمشىلىگىندەگى دەرەككوزدەرگە سىلتەمە جاساپ، اق ءۇي باسشىسى پاتشالىقتا ازاماتتىق يادرولىق باعدارلامانى دامىتۋدى كوزدەيتىن ماڭىزدى كەلىسىمگە جاسىل شام جاققانىن حابارلايدى. قۇجات ساۋد ارابياسى اۋماعىندا ۋراندى بايىتۋعا جول اشۋى مۇمكىن.
"پرەزيدەنت ترامپ ساۋد ارابياسىمەن ماڭىزدى كەلىسىمدى رەسمي تۇردە ماقۇلدادى، بۇل ەلگە ازاماتتىق يادرولىق باعدارلامانى قامتاماسىز ەتىپ، پاتشالىق اۋماعىندا ۋراندى بايىتۋعا ەسىك اشۋى مۇمكىن"، — دەپ باسىلىم پرەزيدەنتتىڭ اينالاسىنداعى شەنەۋنىكتەردەن دايەكسوز كەلتىرەدى.
كەلىسىم اياسىندا ەگەر ەكى جاق تا ساۋد ارابياسىندا ۋران بايىتۋ قوندىرعىلارىن سالۋدى قاجەت دەپ تاپسا، امەريكاندىق كومپانيالار بۇل جۇمىستاردى ورىنداۋعا مىندەتتى بولادى. سونىمەن قاتار باسىلىم دەرەككوزدەرى مۇنداي كەلىسىمدە اقش ءۇشىن قاۋىپسىزدىك كەپىلدىكتەرىنىڭ جوقتىعىنا الاڭداۋشىلىق بىلدىرەدى.