اقش پرەزيدەنتى دونالد ترامپ وتكەن ايدا تۇركيانىڭ انكارا قالاسىندا وتكەن ناتو سامميتىنەن جاسىرىن تۇردە باسقا اسكەري ۇشاقپەن ۇشىپ كەتكەنى بەلگىلى بولدى. بۇل تۋرالى The Washington Post گازەتى دۇيسەنبى كۇنى حابارلادى. اق ءۇي پرەزيدەنتتىڭ Air Force One ۇشاعىندا ۇشىپ بارا جاتقانىن كورسەتۋ ءۇشىن ارنايى ءادىس قولدانعان.
باسىلىمنىڭ مالىمەتىنشە، بۇل ارەكەت يران تاراپىنان ترامپقا قاستاندىق جاساۋ قاۋپىنە بايلانىستى بولعان. جۋرناليستەر مەن اق ءۇي قىزمەتكەرلەرىنىڭ ءبىر بولىگى پرەزيدەنتپەن بىرگە ۇشاقتا وتىرمىن دەپ ويلاعان، الايدا ولار باسقا ۇشاقتا بولعان. ترامپ سامميتكە كاتار سىيلاعان جاڭا ۇشاقپەن بارعان، ءبىراق قايتار جولدا ەسكى ۇلگىدەگى Air Force One ۇشاعىمەن ۇشاتىنىن ايتقان.
الايدا The Washington Post-تىڭ حابارىنا سايكەس، ترامپ ەسكى Air Force One ۇشاعىنا وتىرعاننان كەيىن بىرنەشە مينۋت ىشىندە جاسىرىن تۇردە كىشىرەك ۇشاققا — Air Force C-32A-عا اۋىستىرىلعان. ول ءۇشىن اۋەجايداعى تاماق جۇكتەيتىن ارنايى كولىك پايدالانىلعان. ترامپ ميلدەنحوللعا وسى كىشىرەك ۇشاقپەن ۇشقان.
اق ءۇي بۇل وقيعاعا تىكەلەي تۇسىنىكتەمە بەرمەگەن. اق ءۇيدىڭ كوممۋنيكاسيالار جونىندەگى ديرەكتورى ستيۆەن چۋنگ مالىمدەمەسىندە: «پرەزيدەنتتىڭ ايتۋىنشا، امەريكانىڭ كوپتەگەن جاۋلارى ونى نىساناعا العان، ءبىز بۇل قاۋىپتەردى جويۋ ءۇشىن بارلىق قۇرالداردى قولدانامىز»، — دەگەن. قۇپيا قىزمەت تۇسىنىكتەمە بەرۋدەن باس تارتقان، ال اۋە كۇشتەرى سۇراقتاردى اق ۇيگە باعىتتاعان.
بۇل جاعداي كاتار سىيلاعان جاڭا ۇشاقتىڭ قاۋىپسىزدىگىنە قاتىستى سۇراقتار تۋعىزعان. The New York Times جانە CBS News حابارلاۋىنشا، بارلاۋ قىزمەتتەرى پرەزيدەنتكە نەمەسە ونىڭ ۇشاعىنا شابۋىل جاسالۋى مۇمكىن دەگەن الاڭداۋشىلىق بىلدىرگەن، سوندىقتان قوسىمشا ساقتىق شارالارى قابىلدانىپ، جاڭا ۇشاقتى قايتار جولدا پايدالانباۋ تۋرالى شەشىم قابىلدانعان. ترامپ بۇل ۇشاققا قوسىمشا جاڭارتۋلار جاسالاتىنىن ايتقان.
بۇرىنعى قۇپيا قىزمەت اگەنتى پول ەكلوفف مۇنداي قادامنىڭ ادەتتەن تىس ەكەنىن، ءبىراق بۇرىن-سوڭدى بولماعان دەپ ايتۋعا بولمايتىنىن جەتكىزدى. ول مۇنى ناقتى بارلاۋ اقپاراتىنىڭ بولۋىمەن نەمەسە ايماقتاعى تۇراقسىزدىققا بايلانىستى ساقتىق شاراسىمەن تۇسىندىرۋگە بولاتىنىن ايتتى.
The Washington Post-تىڭ حابارلاۋىنشا، ترامپ ۇشاقتان ءتۇسىپ، ارنايى كولىككە وتىرعاندا، ونىمەن بىرگە بىرنەشە كومەكشىسى بولعان. جۋرناليستەرگە ۇشۋ الدىندا تەرەزە پەردەلەرىن جابۋعا كەڭەس بەرىلگەن. ميلدەنحوللعا جەتكەندە ترامپتىڭ ۇشاقتان تۇسكەنىن فوتوتىلشىلەر تۇسىرگەن، بۇل ونىڭ Air Force One ۇشاعىنا قايتا وتىرعانىن كورسەتكەن.
دەموكرات سەناتور ريچارد بليۋمەنتال بۇل وقيعاعا قاتىستى كونگرەسس تەرگەۋىن تالاپ ەتتى. ول مۇنى «بۇرىن-سوڭدى بولماعان جانە سيۋررەاليستىك» دەپ اتادى. ترامپ ۇشاقتا جۋرناليستەرگە يران تاراپىنان ءقاۋىپ بار-جوعى تۋرالى سۇراققا: «ماعان ۇنەمى ءقاۋىپ ءتونىپ تۇرادى. مەن ولاردىڭ تىزىمىندە ءبىرىنشىمىن»، — دەپ جاۋاپ بەرگەن. ول سونداي-اق: «ءبىراق مەن كەتسەم، سەندەر دە كەتەسىڭدەر»، — دەپ قوسقان.
ميلدەنحوللداعى قىسقا ۆيزيتتەن كەيىن ترامپ جاڭا Air Force One ۇشاعىنا وتىرىپ، ۆاشينگتونعا ۇشقان.