اقش پرەزيدەنتى دونالد ترامپ رەسەي مەن ۋكراينا اراسىنداعى سوعىستى توقتاتۋعا ارنالعان قۇجاتتار پاكەتىن دايىنداۋدى تاپسىردى. ۆاشينگتون سونداي-اق ماسكەۋ، كييەۆ جانە اقش قاتىسۋىمەن ءۇشجاقتى كەلىسسوزدەردى قايتا باستاۋدى كوزدەپ وتىر، دەپ مالىمدەدى اقش-تىڭ ارنايى وكىلى دجارەد كۋشنەر ۋكراين استاناسىنداعى كەزدەسۋلەردىڭ قورىتىندىسى بويىنشا... دەپ حابارلايدى infohub.kz سايتى.
جاڭا پاكەتتىڭ مازمۇنى ازىرگە جاريالانبادى. ءۇشجاقتى كەزدەسۋدىڭ ىقتيمال كۇنى دە بەلگىسىز.
اقش-تىڭ ارنايى وكىلى ستيۆ ۋيتكوفف رەسەي، ۋكراينا جانە اقش اراسىنداعى كەلىسسوزدەر جاقىن ارادا ءوتۋى مۇمكىن ەكەنىن حابارلادى. ونىڭ ايتۋىنشا، ماسكەۋدە امەريكاندىق دەلەگاسياعا رەتتەۋ بويىنشا جاڭا يدەيالار ۇسىنىلدى، كەيىن ولار ۋكراين تاراپىمەن تالقىلاندى.
ۋيتكوفف رەسەي پرەزيدەنتى ۆلاديمير پۋتينمەن كەزدەسۋ كەزىندە ايتارلىقتاي پروگرەسكە قول جەتكىزىلدى دەپ سانايدى.
«ءبىز جاڭا يدەيالاردى تىڭدادىق. زەلەنسكيدىڭ ءۇشجاقتى كەلىسسوزدەر تۋرالى ايتقانىن ەستىدىڭىز، ولار جاقىن ارادا جاريالانادى دەپ ۇمىتتەنەمىز. ماسكەۋدە ءبىز كوپتەگەن باسقا ماڭىزدى جانە نەگىزدى يدەيالاردى تالقىلادىق، ولاردى وسىندا، كيەۆكە اكەلدىك»، — دەدى ول.
اقش قىسقا دەيىن سەرپىلىسكە جەتكىسى كەلەدى
Axios دەرەكتەرىنە سايكەس، ۋيتكوفف پەن كۋشنەر قىس باستالعانعا دەيىن كەلىسسوزدەردە سەرپىلىسكە جەتۋدى كوزدەپ وتىر.
ۋكراينا پرەزيدەنتى ۆلاديمير زەلەنسكي امەريكاندىق دەلەگاسياعا ەلدىڭ قىسقى كەزەڭدە ۇرىس قيمىلدارىن جالعاستىرۋعا دايىندالىپ جاتقانىن ايتتى.
الايدا، Financial Times جازعانداي، كيەۆتە سۋىق تۇسكەنگە دەيىن سوعىستى اياقتاۋ ەكىتالاي دەپ سانايدى.
«سوعىس قىستا دا جالعاساتىن سياقتى»، — دەدى زەلەنسكي.
كەلىسسوزدەر بارىسىندا تاراپتار رەسەيدىڭ ەنەرگەتيكالىق ينفراقۇرىلىمعا سوققىلارى كۇشەيۋى مۇمكىن جاعدايدا ۋكراينانى قىسقى كەزەڭدە قولداۋ ماسەلەلەرىن دە تالقىلادى.
نەگىزگى تاقىرىپتاردىڭ ءبىرى دونباستىڭ بولاشاعى بولدى. اۋماقتىق ماسەلەنى تالقىلاۋ مالىمەتتەرىن تاراپتار جاريالاعان جوق.
كيەۆتەگى كەلىسسوزدەردىڭ قورىتىندىسى
ۋيتكوفف پەن كۋشنەر زەلەنسكيمەن جانە ونىڭ كەڭەسشىلەرىمەن ەكى رەت كەزدەستى. سودان كەيىن تالقىلاۋعا ۇلىبريتانيا، فرانسيا جانە گەرمانيا وكىلدەرى قوسىلدى.
Axios دەرەككوزى كەزدەسۋلەر «جاقسى وتكەنىن» حابارلادى. امەريكالىق تاراپ جاڭارتىلعان بەيبىت ۇسىنىس بويىنشا جۇمىستى جالعاستىرۋدى كوزدەپ وتىر.
ۋيتكوفف كەلىسسوزدەردى مازمۇندى جانە ماڭىزدى دەپ اتادى.
«ءبىز وتە جىگەرلەندىك جانە قاجەتىنشە جۇمىستى جالعاستىرۋعا دايىنبىز»، — دەدى ول.
كۋشنەر اقش تەك قازىرگى ۇرىس قيمىلدارىن توقتاتۋعا عانا ەمەس، سونىمەن قاتار جاڭا سوعىستى بولدىرماۋعا مۇمكىندىك بەرەتىن جاعدايلار جاساۋعا ۇمتىلاتىنىن اتاپ ءوتتى.
«تەك قازىرگى سوعىستى اياقتاۋدىڭ جولىن تابۋ عانا ەمەس، سونىمەن قاتار ۇزاق مەرزىمدى جانە تۇراقتى بەيبىتشىلىك ءۇشىن جاعدايلار مەن كەلىسىمدەر جاساۋ ماڭىزدى»، — دەدى كۋشنەر.
زەلەنسكي كييەۆ ءوز ۇسىنىستارىن دايىنداعانىن حابارلادى. ۋكراينانىڭ باستى تالاپتارىنىڭ قاتارىندا ول سەنىمدى قاۋىپسىزدىك كەپىلدىكتەرىن جانە جاڭا شابۋىل مۇمكىندىگىن بولدىرمايتىن كەلىسىم جاساسۋدى اتادى.
ماسكەۋدە نە تالقىلاندى
ۋيتكوفف پەن كۋشنەر ءۇشىن بۇل امەريكاندىق كەلىسسوزشىلەر رەتىندە ۋكرايناعا العاشقى رەسمي ساپار بولدى. الدىڭعى كۇنى ولار كرەملدە پۋتينمەن كەزدەسۋدە ءۇش ساعاتتان استام ۋاقىت وتكىزدى.
رەسەي تاراپى اڭگىمەنى كونسترۋكتيۆتى جانە پايدالى دەپ اتادى. اق ءۇي كەزدەسۋگە قاتىسۋشىلار جاقىن اپتالاردا ۇسىنىلاتىن كەلەسى قادامداردى تالقىعانىن حابارلادى.
سونىمەن قاتار، ماسكەۋ مەن كيەۆتەگى كەلىسسوزدەردىڭ قورىتىندىسى بويىنشا ناقتى كەلىسىمدەر ازىرگە جاريالانعان جوق.