2024 جىلى اقش-تىڭ بۇرىنعى پرەزيدەنتى دونالد ترامپقا جاسالعان قاستاندىق ارەكەتى كەزىندە وق ءتيىپ جارالانعان دجەيمس كوپەنحاۆەر پيتتسبۋرگتە قايتىس بولدى. بۇل تۋرالى ونىڭ ادۆوكاتى بەيسەنبىدە مالىمدەدى، دەپ حابارلايدى infohub.kz سايتى.
مارقۇم 76 جاستا ەدى. ول پەنسيلۆانيا شتاتىنىڭ باتلەر قالاسىندا وتكەن سايلاۋالدى ميتينگىدە تريبۋنادا وتىرعان. سول ساتتە 20 جاستاعى قارۋلى جاس جاقىن ماڭداعى عيماراتتىڭ توبەسىنەن وق جاۋدىرعان. وقتىڭ بىرەۋى ترامپتىڭ وڭ قۇلاعىن جالما-جان قىرىپ ءوتتى. كوپەنحاۆەردىڭ قولى مەن ىشىنە وق ءتيىپ، ول اۋىر جاراقات الدى. كەيىن ول تاياقپەن جۇرەتىن بولدى.
اتىس كەزىندە تاعى ەكى ادام جارالانعان: دەۆيد داچ امان قالدى، ال كوري كومپەراتورە وتباسىن وقتان قورعاپ، قازا تاپتى.
جەرگىلىكتى بۇقارالىق اقپارات قۇرالدارى سىلتەمە جاساعان اللەگەيني وكرۋگى سوت-مەديسينالىق ساراپشىسىنىڭ حابارلاماسىنا قاراعاندا، كوپەنحاۆەر سارسەنبىدە پيتتسبۋرگتەگى اللەگەيني دەنساۋلىق ساقتاۋ جۇيەسىنە قاراستى ۋەست پەنن اۋرۋحاناسىندا دۇنيەدەن ءوتتى.
كوپەنحاۆەردىڭ ادۆوكاتى دجوزەف فەلدمان وتباسى اتىنان تاراتقان مالىمدەمەسىندە ول جاقىندارىنىڭ ورتاسىندا قايتىس بولعانىن ايتتى. الايدا مالىمدەمەدە ونىڭ ءولىمى ميتينگىدە العان جاراقاتتارىمەن تىكەلەي بايلانىستى ما، بۇل ناقتىلانباعان.
كوپەنحاۆەر مەن ونىڭ ايەلى مارياننا كوپەنحاۆەر ماۋسىم ايىندا فەدەرالدىق ۇكىمەتكە قارسى سوتقا شاعىم تۇسىرگەن. وندا اقش-تىڭ قۇپيا قىزمەتى مەن ىشكى قاۋىپسىزدىك دەپارتامەنتى ميتينگىدە ءتيىستى قاۋىپسىزدىك شارالارىن مۇلدەم قامتاماسىز ەتە الماعانى ايىپتالعان.
كوپەنحاۆەرگە بىرنەشە وتا جاسالعان، ونىڭ ىشىندە توق ىشەگىن كەسۋ وپەراسياسى دا بار. ول بۇيرەك جانە باسقا دا اعزالارىنىڭ زاقىمدانۋىنان زارداپ شەگىپ، اياعىندا سەزىمتالدىقتان ايىرىلعان. سوت شاعىمىندا جاراقاتتار «قابىلەتسىز ەتەتىن، اۋىر، تۇراقتى جانە ءومىردى وزگەرتەتىن» دەپ سيپاتتالعان.
ترامپ بەيسەنبىدە الەۋمەتتىك جەلىدەگى جازباسىندا كوپەنحاۆەردى «ناعىز امەريكالىق پاتريوت» دەپ اتادى.
«دجيم زور باتىلدىق تانىتتى، ول «كۇرەس، كۇرەس، كۇرەس» دەپ جالعاستىرا بەردى جانە ەلەستەتۋگە قيىن قيىندىقتارعا قاراماستان وڭ كوڭىل-كۇيىن ساقتادى»، — دەپ جازدى ترامپ.