قازاقستاندا كاسپي تەڭىزىنىڭ تۇبىمەن ءازىربايجان مەن قازاقستاندى سيفرلىق ارتەريامەن جالعاعان ترانسكاسپي تالشىقتى-وپتيكالىق بايلانىس جەلىسىن (توبج) تارتۋدىڭ نەگىزگى كەزەڭى اياقتالدى، دەپ حابارلايدى infohub.kz سايتى.
سۋ استى كابەلى قازاقستان جاعالاۋىنا جەتتى، بۇل جوبانىڭ ەڭ كۇردەلى بولىگىنىڭ اياقتالعانىن بىلدىرەدى. جوبانى «قازاقتەلەكوم» جانە AzerTelecom International كومپانيالارى جۇزەگە اسىرۋدا. اقتاۋ — سۋمعايىت جاڭا باعىتى ازيا مەن ەۋروپا اراسىنداعى دەرەكتەردى بەرۋدىڭ تىكەلەي جوعارى جىلدامدىقتى دالىزىنە اينالادى. جوبا حالىقارالىق بايلانىستىڭ سەنىمدىلىگىن ارتتىرۋعا جانە ەكى ەلدىڭ ترانزيتتىك الەۋەتىن نىعايتۋعا باعىتتالعان.
تەڭىز كەزەڭىنىڭ اياقتالۋىنا بايلانىستى كابەل تارتاتىن كەمە بورتىنان ۆيسە-پرەمەر — يي جانە سيفرلىق دامۋ ءمينيسترى جاسلان مادييەۆ، «قازاقتەلەكوم» باسشىسى باعدات مۋسين جانە AzerTelecom International باس ديرەكتورى انا ناكاشيدزە جۇمىس بارىسىمەن تانىستى.
«جاڭا باعىت قازاقستاننىڭ الەمدىك دەرەكتەر بەرۋ جەلىلەرىمەن سيفرلىق بايلانىسىن نىعايتىپ، يي، بۇلتتى تەحنولوگيالار مەن زاماناۋي دەرەكتەردى وڭدەۋ ورتالىقتارىن ودان ءارى دامىتۋعا نەگىز قالايدى»، — دەپ اتاپ ءوتتى جاسلان مادييەۆ.
ءقازىر كابەلدى جاعالاۋ ينفراقۇرىلىمىنا قوسۋ جۇمىستارى جۇرگىزىلۋدە. كۇزدە جەر ءۇستى ينفراقۇرىلىمىنىڭ قۇرىلىسىن اياقتاۋ، ىسكە قوسۋ-رەتتەۋ جۇمىستارىن جۇرگىزۋ جانە جۇيەنى تەستىلەۋ جوسپارلانۋدا. ماگيسترالدىڭ قۇرىلىسى مەن ودان ءارى پايدالانۋىنا «قازاقتەلەكوم» مەن AzerTelecom International بىرلەسكەن كاسىپورنى CaspiLink B.V. جاۋاپتى بولادى.
جوبا 2025 جىلى باستالدى. الدىمەن ماماندار ينجەنەرلىك زەرتتەۋلەر جۇرگىزىپ، وڭتايلى باعىتتى انىقتاپ، كابەلدى سىناقتان وتكىزدى. تەڭىزدە تارتۋ جۇمىستارى 2026 جىلدىڭ شىلدەسىندە باستالدى. جۇمىستار سۋ ىعىستىرۋى 20 مىڭ توننادان اساتىن ارنايى كەمەنىڭ كومەگىمەن تاۋلىك بويى جۇرگىزىلدى. جوباعا 70 مامان تارتىلدى.
جوبا وپەراتورلاردىڭ مەنشىكتى قاراجاتى ەسەبىنەن، بيۋدجەت قارجىسىن تارتپاي جۇزەگە اسىرىلۋدا.