اقش-تاعى ارالىق سايلاۋعا ءبىر ايدان از ۋاقىت قالعاندا، دونالد ترامپ اكىمشىلىگى جوعارعى سوتقا پوشتا ارقىلى داۋىس بەرۋگە قاتىستى شەكتەۋلەردى قالپىنا كەلتىرۋ تۋرالى ءوتىنىشىن قايتا جولدادى. بۇعان دەيىن فەدەرالدى سۋديا جاڭا شەكتەۋلەردىڭ كۇشىن جويعان ەدى، دەپ حابارلايدى infohub.kz سايتى.
جەكسەنبى كۇنى جوعارعى سوتقا جىبەرىلگەن قۇجاتتا باس پروكۋروردىڭ ورىنباسارى دجون ساۋەر اقش پوشتا قىزمەتىنە (USPS) ترامپتىڭ اتقارۋشى بۇيرىعىن ورىنداۋعا تىيىم سالاتىن سوت شەشىمىنە قارسى شىقتى. بۇل شەشىمدى فەدەرالدى وكرۋگتىك سۋديا ينديرا تالۆاني جۇما كۇنى ۇزارتقان بولاتىن.
داۋىس بەرۋ بيۋللەتەندەرى ءارتۇرلى شتاتتاردا پوشتا ارقىلى جىبەرىلە باستاعاندىقتان، اكىمشىلىكتىڭ ەرەجەلەرگە وزگەرىس ەنگىزۋگە ۋاقىتى از. ساۋەردىڭ وتىنىشىندە اتاپ وتىلگەندەي، سولتۇستىك كارولينادا بيۋللەتەندەر جىبەرىلە باستادى، ال الابامادا 9 قىركۇيەكتە، تاعى بەس شتاتتا 13 قىركۇيەكتە باستالادى. ول سوت تىيىمى كۇشىندە تۇرعان كەزدە ءاربىر كۇن سايلاۋ پروسەسىندە شاتاسۋ مەن حاوس تۋدىرۋى مۇمكىن ەكەنىن، سەبەبى دايىندىق شارالارى مىندەتتى ەمەس، ەرىكتى بولىپ قالاتىنىن جەتكىزدى.
بۇل — اكىمشىلىكتىڭ جوعارعى سوتتان داۋعا ارالاسۋدى سۇراعان ءۇشىنشى ارەكەتى. سوت بۇعان دەيىن جوسپاردى جۇزەگە اسىرۋعا رۇقسات بەرگەن، ءبىراق ونىڭ زاڭدىلىعى تۋرالى شەشىم شىعارماعان.
بۇل داۋدىڭ ناتيجەسى بيىلعى سايلاۋعا ايتارلىقتاي اسەر ەتۋى مۇمكىن، ويتكەنى كونگرەستەگى باقىلاۋ تالاسقا ءتۇسىپ تۇر. اقش سايلاۋشىلارىنىڭ شامامەن ۇشتەن ءبىرى پوشتا ارقىلى داۋىس بەرەدى.
اقش پرەزيدەنتى ناۋرىز ايىندا اتقارۋشى بۇيرىققا قول قويعان بولاتىن. بۇل بۇيرىق USPS-كە ءاربىر شتاتتا داۋىس بەرۋگە قۇقىعى بار ازاماتتاردىڭ فەدەرالدى تىزىمىنە ەنبەگەن سايلاۋشىلارعا بيۋللەتەندەردى جەتكىزۋگە تىيىم سالادى. مۇنداي ءتىزىمدى ىشكى قاۋىپسىزدىك دەپارتامەنتى (DHS) جۇرگىزەدى. ناتيجەسىندە بيۋللەتەندەر تەك ماقۇلدانعان تىزىمدەگى سايلاۋشىلارعا عانا جەتكىزىلەدى.
دەموكراتيالىق شتاتتار مەن سايلاۋشىلاردىڭ قۇقىعىن قورعايتىن توپتار بۇل وزگەرىستەردى كونستيتۋسياعا قايشى دەپ سانايدى. ال سايلاۋدى وتكىزەتىن شتاتتىق لاۋازىمدى تۇلعالار جاڭا فەدەرالدى تالاپتاردى ورىنداۋ ءۇشىن جۇيەلەرىن وزگەرتۋگە ۋاقىت جەتكىلىكسىز ەكەنىن ايتادى.
ترامپ اكىمشىلىگى پوشتا ارقىلى داۋىس بەرۋدى شەكتەۋ جوسپارىن «اقىلعا قونىمدى شارالار» دەپ اتايدى جانە ونى سايلاۋ قاۋىپسىزدىگىن قامتاماسىز ەتۋمەن تۇسىندىرەدى. ال بۇل جوسپاردىڭ كۇشىن جويۋ تۋرالى سوت شەشىمىن «نەگىزسىز جانە زاڭسىز» دەپ سانايدى.
ترامپ بۇعان دەيىن دە پوشتا ارقىلى داۋىس بەرۋدى شەكتەۋگە بىرنەشە رەت تىرىسقان، دەگەنمەن ءوزى بۇل ءادىستى ءجيى قولدانعان. ول 2020 جىلعى سايلاۋداعى جەڭىلىسىن پوشتا ارقىلى داۋىس بەرۋمەن بايلانىستىرىپ، الاياقتىق تۋرالى نەگىزسىز ايىپتاۋلاردى العا تارتقان.
USPS ءوز كەزەگىندە، ەگەر سوت تىيىمدارى الىنىپ تاستالسا، ترامپتىڭ جاڭا شەكتەۋلەرىن ەنگىزۋگە دايىن ەكەنىن مالىمدەدى. بۇل شەكتەۋلەر فەدەرالدى سايلاۋلاردا شتاتتاردان پوشتا ارقىلى جىبەرىلەتىن بيۋللەتەندەرگە بايلانىستى اتاۋلار مەن شتريح-كودتاردى پوشتا قىزمەتىنە بەرۋدى تالاپ ەتەدى.