ادەبيەتتىك وقۋ (2 - سىنىپ)
ساباقتىڭ تاقىرىبى: «تۋعان ءتىلىم وركەندە!»
ساباقتىڭ ماقساتتارى:
بىلىمدىلىك:
وقۋشىلارعا ولەڭدى مانەرلەپ وقىپ، جاڭىلتپاشتى جاڭىلماي ايتۋدى، جۇمباق شەشۋدى ۇيرەتۋ. ءبىلىم سايىسىن وتكىزۋ.
دامىتۋشىلىق: بايلانىستىرىپ سويلەۋ داعدىلارىن جەتىلدىرۋ، تىلدەرىن، وي - ءورىسىن دامىتۋ.
تاربيەلىك: بىلىمدىلىككە، ىزدەنىمپازدىققا، شىعارماشىلىققا تاربيەلەۋ.
ساباقتىڭ ءتۇرى: سايىس ساباق.
ساباقتىڭ كورنەكىلىگى: ينتەربەلسەندى تاقتا، سۋرەتتەر.
ساباقتىڭ ءادىس - تاسىلدەرى: سۇراق - جاۋاپ، توپتاستىرۋ، جۇمباق شەشۋ، جاڭىلتپاش ايتۋ، ولەڭدى مانەرلەپ وقۋ، ديداكتيكالىق ويىن: «ءسوز ويلا، تەز ويلا».
ساباقتىڭ ءجۇرۋ بارىسى:

1. ۇيىمداستىرۋ
وقىتۋشى:
- بالالار، ءقازىر جىلدىڭ قاي مەزگىلى؟
وقۋشىلار:
- ءقازىر جىلدىڭ كۇز مەزگىلى.
وقىتۋشى:
- كۇز مەزگىلىنىڭ قاي ايى؟
وقۋشىلار:
- كۇز مەزگىلىنىڭ قىركۇيەك ايى.
وقىتۋشى:
- قىركۇيەك ايىندا قانداي مەرەكەلەر بار؟
وقۋشىلار:
- ءبىلىم كۇنى، ءتىل مەرەكەسى.
وقىتۋشى:
- دۇرىس بالالار! ال ءبىزدىڭ مەملەكەتتىك ءتىلىمىز قاي ءتىل؟
وقۋشىلار:
- مەملەكەتتىك ءتىلىمىز – قازاق ءتىلى.
وقىتۋشى:
- دۇرىس! ويتكەنى ءبىز قازاقپىز. وتانىمىز – قازاقستان.
سوندىقتان دا ءبىز قازاق تىلىندە سويلەيمىز، مەملەكەتتىك تىلىمىزدە ءبىلىم الامىز. بۇگىنگى ساباقتا، بالالار، وسى ۋاقىتقا دەيىن وتكەن تاقىرىپتاردى قايتالايمىز. قايتالاۋ ساباق بولعاندىقتان، ساباقتى سايىس تۇرىندە وتكىزۋدى ءجون كوردىم. سايىستى باستاماس بۇرىن توپقا ءبولىنىپ، ورىندارىڭىزعا وتىرىڭدار.
- بالالار، ءبىزدىڭ مەكتەپتە ءتىل مەرەكەسىنە ارناپ «انا ءتىلىڭ – ارىڭ بۇل» اتتى اپتالىق ءوتىپ جاتىر. ءبىز دە بۇگىنگى ساباعىمىزدى ءتىل مەرەكەسىنە ارنايمىز. سايىس - ساباعىمىزدىڭ تاقىرىبى. «تۋعان ءتىلىم، وركەندە!». الدىمەن سايىستىڭ شارتىمەن تانىستىرايىن. (ينتەربەلسەندى تاقتاعا جازىلعان).
«انا ءتىلىڭ – ارىڭ بۇل»
«تۋعان ءتىلىم، وركەندە!»
سايىس - ساباقتىڭ شارتتارى:
1. ولەڭدى مانەرلەپ وقۋ
2. جۇمباق شەشۋ
3. جاڭىلتپاش ايتۋ
4. ماقال - ماتەل سايىسى (ماعىناسىن اشۋ)
5. «ءسوز ويلا، تەز ويلا» ديداكتيكالىق ويىن.
وقىتۋشى:
- بۇل سايىستا ءادىلقازىلار وزدەرىڭىز بولاسىڭدار، ياعني ءبىر - ءبىرىڭىزدى باعالايسىڭدار.
سايىس رەت - رەتىمەن وتەدى، وقۋشىلار وزدەرى باعالايدى. ساباقتىڭ سوڭىندا قورىتىندى ۇپايلار، باعالار ەسەپتەلىپ، جەڭىمپاز توپ انىقتالادى، ماراپاتتالادى.