مال جايۋ ەرەجەسىن بۇزۋ جىلقى يەسىنە جارتى ميلليون تەڭگەدەن استامعا ءتۇستى: شۋ اۋداندىق سوتى يەسىن جانۋاردىڭ جولاۋشىلار پوەزىمەن سوقتىعىسۋىنان كەلتىرىلگەن زالالدى وتەۋگە مىندەتتەدى، دەپ حابارلايدى infohub.kz سايتى.
جامبىل وبلىسىنىڭ شۋ اۋداندىق سوتى «ك.» ءجشس-نىڭ ازامات ت.-عا جولاۋشىلار پوەزىنىڭ جىلقىعا سوعىلۋىنان كەلتىرىلگەن ماتەريالدىق زالالدى وتەۋ تۋرالى تالاپ ارىزى بويىنشا ازاماتتىق ءىستى قارادى.
تەرگەۋ بارىسىندا انىقتالعانداي، وقيعا 2025 جىلدىڭ قاراشا ايىندا وتار – شۋ تەمىرجول ۋچاسكەسىندە تۇنگى ۋاقىتتا بولعان. جولاۋشىلار پوەزى قوزعالىس كەزىندە جولعا كەنەتتەن شىعىپ كەتكەن جىلقىنى قاعىپ كەتتى. ماشينيست ۋاقتىلى توتەنشە تەجەۋ جاساپ، قاتتى دىبىستىق سيگنال بەرگەنىمەن، سوقتىعىسۋدان قۇتىلا المادى.
سالدارىنان ەلەكتروۆوز مەحانيكالىق زاقىم الىپ، جوندەۋگە جىبەرىلدى. قالپىنا كەلتىرۋ جۇمىستارىنىڭ قۇنى 531 مىڭ تەڭگەنى قۇرادى.
قۇقىق قورعاۋ ورگاندارى جانۋاردىڭ يەسىن انىقتادى. ونىڭ بۇعان دەيىن تەمىرجول توسەمىنىڭ جانىندا مال جايۋ ەرەجەسىن بۇزعانى ءۇشىن اكىمشىلىك جاۋاپكەرشىلىككە تارتىلعانى بەلگىلى بولدى.
ءىس ماتەريالدارى مەن ۇسىنىلعان دالەلدەمەلەردى زەرتتەي كەلە، سوت جاۋاپكەردىڭ مال جايۋ ەرەجەسىن بۇزۋى مەن لوكوموتيۆكە زالال كەلتىرۋ اراسىندا تىكەلەي سەبەپ-سالدار بايلانىسى بار دەپ شەشتى. تالاپكەردىڭ تالاپتارى نەگىزدى دەپ تانىلدى.
شۋ اۋداندىق سوتىنىڭ شەشىمىمەن جاۋاپكەردەن «ك.» ج ش س پايداسىنا 531 مىڭ تەڭگە مولشەرىندەگى ماتەريالدىق زالال، سونداي-اق مەملەكەتتىك باج سالىعىن تولەۋگە جۇمسالعان شىعىندار ءوندىرىلدى.
سوتتا بۇل شەشىم ازىرگە زاڭدى كۇشىنە ەنبەگەنىن جانە زاڭنامادا بەلگىلەنگەن تارتىپپەن شاعىمدانۋى مۇمكىن ەكەنىن اتاپ ءوتتى.