كوپ جىل بويى تۇنگى اۋىسىمدا جۇمىس ىستەۋ ايەلدەردىڭ سيركادالىق ىرعاق گەندەرىنىڭ ەكسپرەسسياسىن وزگەرتىپ، ولاردىڭ جۇيەلىك ۇيلەسىمىن السىرەتەدى. بۇل تۋرالى Frontiers in Endocrinology جۋرنالىندا جاريالانعان زەرتتەۋ ناتيجەلەرى كورسەتتى، دەپ حابارلايدى infohub.kz سايتى.
كروسس-سەكسيالىق زەرتتەۋگە 37 مەن 66 جاس ارالىعىنداعى 93 مەديسينا قىزمەتكەرى قاتىستى. ەرىكتىلەر ەكى توپقا ءبولىندى: 47 ادام تەك كۇندىزگى اۋىسىمدا جۇمىس ىستەسە، 46 ادام تۇراقتى تۇنگى جۇمىس تاجىريبەسىنە يە بولدى، ولاردىڭ 57%-ى مانسابىندا 1000-نان استام تۇنگى اۋىسىمدى وتكىزگەن.
زەرتتەۋ اۆتورلارى تاڭعى اش قارىنعا الىنعان قان ۇلگىلەرىن وت-پتر ادىسىمەن تالداپ، CLOCK، TEF، PER1، PER3 جانە YY1 گەندەرىنىڭ ەكسپرەسسيا دەڭگەيىن باعالادى. تالداۋ تۇنگى جۇمىس ىستەيتىن ايەلدەردە CLOCK، TEF، PER1 جانە YY1 گەندەرىنىڭ ەكسپرەسسيا دەڭگەيى كۇندىزگى كەستەدەگى ارىپتەستەرىنە قاراعاندا ايتارلىقتاي تومەن بولعانىن كورسەتتى. دەڭگەيى ەلەۋلى وزگەرمەگەن جالعىز گەن — PER3، الايدا ونىڭ جەلىسىندەگى بايلانىستار دا ترانسفورماسياعا ۇشىرادى.
زەرتتەۋشىلەر TEF جانە YY1 گەندەرىنىڭ كورسەتكىشتەرى تۇنگى جۇمىستاعى ۇزاق ەڭبەك ءوتىلى مەن اۋىسىمداردىڭ جالپى سانى كوپ بولعاندا بارىنشا قاتتى تومەندەيتىنىن انىقتادى. سونىمەن قاتار تۇنگى جۇمىسشىلاردا سيركادالىق رەتتەۋ گەندەرى اراسىنداعى جالپى جۇيەلىك ۇيلەسىم السىرەدى.
عالىمدار الىنعان ناتيجەلەر وسى وزگەرىستەردىڭ قايتىمدىلىعىن جانە ولاردىڭ ۇزاق مەرزىمدى دەنساۋلىق قاۋىپتەرىنە قالاي اسەر ەتەتىنىن ءتۇسىنۋ ءۇشىن ودان ءارى لونگيتيۋدتىك زەرتتەۋلەردى قاجەت ەتەتىنىن اتاپ ءوتتى.