استانانىڭ ەكى تۇرعىنى تۇنگى ۋاقىتتا تۇرعىن ۇيلەردىڭ جانىندا ساليۋت اتىپ، بەس تاۋلىككە قاماۋعا الىندى، دەپ حابارلايدى infohub.kz.
ءبىرىنشى وقيعا 50 جاستاعى ەر ادامعا قاتىستى بولدى. ول بولاشاق كەلىنىنىڭ تۋعان كۇنىنە وراي قوناق ءۇيدىڭ جانىندا فەيەرۆەرك ۇيىمداستىرعان. ساليۋت ماڭايداعى تۇرعىن ءۇي كەشەندەرىنىڭ تۇرعىندارىنىڭ تىنىشتىعىن بۇزعان. سوت ونى ۇساق بۇزاقىلىق جاسادى دەپ تانىپ، بەس تاۋلىككە قاماۋعا الدى.
ەكىنشى جاعدايدا 26 جاستاعى جىگىت قىز ۇزاتۋ راسىمىنەن كەيىن كوپقاباتتى تۇرعىن ءۇيدىڭ جانىندا ساليۋت اتقان. ونىڭ ارەكەتى دە قوعامدىق ءتارتىپتى بۇزعاندىقتان، سوت وعان دا ءدال وسىنداي جازا تاعايىندادى.
پوليسيا تۇرعىن ۇيلەردىڭ جانىندا، اسىرەسە تۇندە پيروتەحنيكانى اتۋ ازاماتتاردىڭ تىنىشتىعىن بۇزاتىنىن جانە قاۋىپسىزدىككە ءقاۋىپ ءتوندىرۋى مۇمكىن ەكەنىن ەسكەرتتى.
«مەرەكەلىك شارالار باسقالارعا قولايسىزدىق تۋدىرماي، تەك جاعىمدى ەموسيالار اكەلۋى كەرەك»، — دەدى پوليسيا قىزمەتكەرلەرى.
بۇعان دەيىن «كۋرسيۆ» 18 جاستاعى قازاقستاندىقتىڭ Audi ليۋگىنەن ساليۋت اتقانى ءۇشىن جازالانعانىن حابارلاعان بولاتىن.