تۇركىستان وبلىسىنىڭ پوليسەيلەرى جەتى تاۋلىك بويى كۇيەۋىمەن جانجالدان كەيىن ءتورت بالاسىمەن بىرگە ۇيدەن شىعىپ كەتكەن ايەلدى ىزدەدى. ونىڭ شىمكەنتكە بارىپ، تۋىستارىنا حابارلاماي پاتەر جالداعانى انىقتالدى، — دەپ حابارلايدى infohub.kz سايتى.
وتىرار اۋدانىنىڭ تۇرعىنى پوليسياعا جۇگىندى: ونىڭ ايەلى بالالارىمەن بىرگە ۇيدەن شىعىپ، ءبىر اپتا بويى قايتىپ كەلمەگەن. ىزدەستىرۋ جۇمىستارىنا تۇركىستان وبلىسى پوليسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسى مەن وتىرار اۋداندىق پوليسيا ءبولىمىنىڭ قىزمەتكەرلەرى جۇمىلدىرىلدى. اۋداننىڭ كىرەبەرىس جانە شىعابەرىس جولدارىنا باقىلاۋ بەكەتتەرى قويىلىپ، كولىكتەر تەكسەرىلدى، ال كورشى اۋماقتارعا باعىتتامالار جىبەرىلدى.
6، 5، 3 جاستاعى جانە 10 ايلىق بالالارى بار ايەلدى تاكسيدەن تاۋىپ، بولىمگە جەتكىزدى. ونىڭ كەتۋىنە كۇيەۋىمەن تۇرمىستىق جانجال سەبەپ بولعانى انىقتالدى: رەنجىپ، ول بالالارى مەن قۇجاتتارىن الىپ، ەشكىمگە ەشتەڭە ايتپاي شىمكەنتكە كەتىپ، پاتەر جالداعان.
«جاقىن تۋىستارى شاقىرىلىپ، پوليسيا قىزمەتكەرلەرى پروفيلاكتيكالىق ءتۇسىندىرۋ جۇمىسىن جۇرگىزدى. وتباسى مۇشەلەرى تاتۋلاسىپ، امان-ەسەن ۇيلەرىنە ورالدى»، — دەپ حابارلادى تۇركىستان وبلىسى پوليسيا دەپارتامەنتىنىڭ ءباسپاسوز قىزمەتى.