قازاقستان دەلەگاسيالارىنىڭ گرۋزيا، تۇركيا جانە ازەربايجانعا ساپارلارى ناتيجەسىندە ترانسۇلتتىق قىلمىستىق توپتارمەن كۇرەس كۇشەيتىلدى، دەپ حابارلايدى infohub.kz.
جولعا قويىلعان بايلانىس ارنالارىنىڭ ارقاسىندا ستامبۋلدا قازاقستان ازاماتى يسمايلوۆتىڭ ءولتىرىلۋى اشىلدى، ەكى ورىنداۋشى ۇستالدى. حالىقارالىق ىزدەۋدە جۇرگەن ترانسۇلتتىق قىلمىستىق ورتادان شىققان ۇيىمداستىرۋشى مەن تاپسىرىس بەرۋشى انىقتالدى. بۇل دەرەكتەر اقش-تا جازاسىن وتەپ جاتقان كريمينالدىق اۆتوريتەت باسقاراتىن ۇيىمداسقان قىلمىستىق توپتىڭ باسقا دا اۋىر قىلمىستارىن اشۋعا كومەكتەستى. الماتىدا توپتىڭ كىللەرلەرىنىڭ ءبىرى ۇستالدى، ول 2025 جىلعى تامىزدا قالا تۇرعىنىنا ولتىرۋگە وقتالعان. قىلمىس قۇرالى – تاپانشا – تاركىلەندى. وسى فاكت بويىنشا تەرگەۋ اياقتالدى، قىلمىستىق ءىس سوتقا جىبەرىلدى.
«ىشكى ىستەر مينيسترلىگى گرۋزيا جانە تۇركيا ارىپتەستەرىمەن بىرلەسىپ، ءۇش مەملەكەت اۋماعىندا ترانسۇلتتىق ۇيىمداسقان قىلمىستىق توپتىڭ قاتىسۋشىلارىن ۇستاۋ بويىنشا كەزەڭ-كەزەڭىمەن ارنايى وپەراسيا جۇرگىزدى. الماتى قالاسىندا اتالعان قىلمىستىق قۇرىلىمعا قاتىسۋشىلاردان تۇراتىن ءبىر توپ ادام ۇستالدى، ولارعا قارۋ قولدانۋ ارقىلى بىرنەشە شابۋىل جاساۋ فاكتىلەرىنە قاتىستىلىعى ايىپتالۋدا. قازىرگى تاڭدا بارلىق بەلگىلى قىلمىستىق فاكتىلەر بويىنشا دالەلدەمەلەر جيناۋ جالعاسۋدا، بارلىق قاتىستى ادامدار انىقتالۋدا. توپ ۇيىمداستىرۋشىسىن زاڭناماعا سايكەس جاۋاپكەرشىلىككە تارتۋ بويىنشا جۇمىس جۇرگىزىلۋدە»، – دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.
بۇعان دەيىن گرۋزيادا تاعى ءبىر داۋلى ۇستاۋ ورىن الدى: بۇل جولى سكاندالدى kizdar.net رەسۋرسىنىڭ مەنەدجەرى تۋرالى ايتىلىپ وتىر.