الماتىدا بالالارداعى تەرەڭ كۇيىكتەردى ەمدەۋگە جانە اۋىر جاراقاتتاردان كەيىن قوزعالىس قابىلەتىن قالپىنا كەلتىرۋگە ارنالعان حالىقارالىق شەبەرلىك ساباعى ءوتىپ جاتىر، دەپ حابارلايدى infohub.kz سايتى.
ءىس-شارا بالالار شۇعىل مەديسينالىق كومەك ورتالىعىنىڭ بازاسىندا ۇيىمداستىرىلدى. تۇرىك ماماندارى تەرى پلاستيكاسىنا ارنالعان زاماناۋي قۇرىلعىلاردى الا كەلىپ، ولاردى الماتى ورتالىعىنا تابىستادى.
ءبىر اپتا بويى قازاقستان مەن تۇركيانىڭ دارىگەرلەرى بىرلەسكەن وپەراسيالار جاساپ، پاسيەنتتەرگە كەڭەس بەرىپ، كۇردەلى كلينيكالىق جاعدايلاردى تالداۋدا.
بالالار شۇعىل مەديسينالىق كومەك ورتالىعىنىڭ كۇيىك بولىمشەسىنىڭ مەڭگەرۋشىسى رادجا جۋماديلداەۆتىڭ ايتۋىنشا، جىل سايىن كلينيكاعا كۇيىكپەن شامامەن 2 مىڭ بالا جۇگىنەدى، ونىڭ مىڭنان استامى اۋرۋحاناعا جاتقىزۋدى قاجەت ەتەدى.
انكاراداعى بالالار حيرۋرگياسى كلينيكاسى مەن كۇيىك ورتالىعىنىڭ جەتەكشىسى ەمراح شەنەل شەبەرلىك ساباعى اياسىندا كۇيىكتەن كەيىن تىرتىق وزگەرىستەرىنە بايلانىستى اياعىن قالىپتى قوزعالتا الماعان بالاعا وپەراسيا جاسالعانىن ايتتى. «ءبىز اياقتىڭ قوزعالعىشتىعىن قالپىنا كەلتىردىك. قازاقستاندىق ارىپتەستەر مۇنداي وپەراسيالاردى جاقسى مەڭگەرگەن. ءبىر جاعىن جەرگىلىكتى حيرۋرگتەر، ال ەكىنشى جاعىن ءبىز بىرلەسىپ جاسادىق»، — دەپ اتاپ ءوتتى ول.
بۇعان دەيىن قازاقستاندىق دارىگەرلەر گاز باللونى جارىلعاننان كەيىن دەنەسىنىڭ 89 پايىزى كۇيگەن جىگىتتى امان الىپ قالعان ەدى، ال ودان بۇرىن الماتىدا كۇيىكتەن اۋىر جاراقات العان جەتى بالاعا پلاستيكالىق وپەراسيا جاسالعان بولاتىن.