تۇركىستان وبلىسىندا جانۋارلار سۇيەگىن جەلاتين مەن مايعا وڭدەيتىن زاۋىت ىسكە قوسىلۋعا دايىندالۋدا. جوبانىڭ جالپى قۇنى 9 ملرد تەڭگەنى قۇرايدى، دەپ حابارلايدى infohub.kz سايتى.
تۇركىستان وبلىسى ورداباسى اۋدانىنداعى تەمىرلان اۋىلىندا Huating Biotechnology كومپانياسىنىڭ مال شارۋاشىلىعى قالدىقتارىن كادەگە جاراتۋ جانە سۇيەكتەردى تەرەڭ وڭدەۋ زاۋىتىنىڭ قۇرىلىسى اياقتالۋعا جاقىن. كاسىپورىندا سۇيەكتەن مامىر مەن جەلاتين كومپونەنتتەرى وندىرىلەتىن بولادى. سونداي-اق سۇيەكتەردى ۇساقتاپ، ودان كەراميكا مەن جەمشوپ جاساۋ جوسپارلانۋدا.
جوباعا سالىنعان جالپى ينۆەستيسيا 9 ملرد تەڭگەنى قۇرايدى، العاشقى كەزەڭگە 2،5 ملرد تەڭگە جۇمسالعان. ءبىرىنشى كەزەڭ قىركۇيەكتە ىسكە قوسىلۋى ءتيىس. كاسىپورىندا جىلىنا 5 مىڭ توننا مامىر جانە جەلاتين كومپونەنتتەرىن ءوندىرۋ جوسپارلانۋدا. تولىق قۋاتتىلىقتا 100 جاڭا جۇمىس ورنى اشىلادى.
زاۋىتتا قۇرىلىس-مونتاج جۇمىستارى اياقتالعان، ءقازىر جابدىقتار ورناتىلىپ، ىسكە قوسۋ-باپتاۋ جۇمىستارى جۇرگىزىلۋدە. بولاشاقتا مال قانىن كادەگە جاراتۋ ارقىلى ءوندىرىستى كەڭەيتۋ، قوسىمشا ونىمدەر، سونىڭ ىشىندە جەمشوپ شىعارۋ جوسپارلانۋدا.
وبلىس اكىمى نۇرالحان كوشەروۆ زاۋىتقا شيكىزاتتى اۋدانداعى بورداقىلاۋ الاڭدارىنان جەتكىزۋدى ۇسىندى. بۇل شيكىزاتتى ءتيىمدى پايدالانۋعا جانە وڭدەۋ تىزبەگىن كەڭەيتۋگە مۇمكىندىك بەرەدى.
جوبا ورداباسى اۋدانىندا تەرەڭ وڭدەۋدى دامىتۋعا، مال شارۋاشىلىعى قالدىقتارىن كادەگە جاراتۋدى جولعا قويۋعا جانە جاڭا وندىرىستىك تىزبەك قۇرۋعا مۇمكىندىك بەرەدى.
بۇعان دەيىن جوبانىڭ ينۆەستورى قىتايدىڭ Tangshan Huating Ceramics Co كومپانياسى ەكەنى حابارلانعان بولاتىن. Huating Biotechnology كومپانياسى جۇڭگو ازاماتتارى جاو بوكانگ پەن جاو حۋەدونگكە تيەسىلى.
بۇعان دەيىن Huating Biotechnology كومپانياسىنىڭ وكىلدەرى «كۋرسيۆ» تىلشىسىنە حالىقارالىق نارىقتا ءمۇيىز بەن تۇياقتىڭ ءبىر تونناسى شامامەن 400 مىڭ يۋانعا ($60 مىڭ) ساتىلا الاتىنىن ايتقان بولاتىن.