تۇركىستان وبلىسىندا پوليسيا مەن بلوگەرلەر بىرلەسكەن رەيدتەر كەزىندە قازاقستاندا تىركەلمەگەن شەتەل ءنومىرلى بەس اۆتوكولىكتى انىقتادى، دەپ حابارلايدى Polisia.kz.
ءىس-شارالار «ءقاۋىپسىز جول» جەدەل-پروفيلاكتيكالىق ءىس-شاراسى اياسىندا جۇرگىزىلۋدە. رەيدتەردىڭ بىرىندە ينسپەكتورلار بەس كولىكتى توقتاتىپ، تەكسەردى: Toyota Alphard، Hyundai Santa Fe، Hyundai Sonata، Toyota Camry جانە BMW. بارلىق جۇرگىزۋشىلەر اكىمشىلىك جاۋاپكەرشىلىككە تارتىلدى.
پوليسەيلەر اۆتوكولىك يەلەرىنە قازاقستاندا كولىكتى ۋاقىتىلى تىركەۋ قاجەتتىگىن ەسكەرتتى. مەملەكەتتىك ءنومىرسىز نەمەسە رەسپۋبليكادا تىركەلمەگەن، سونداي-اق پايدالانۋعا تىيىم سالىنعان كولىكتى باسقارعانى ءۇشىن 10 اەك (2026 جىلى 43 250 تەڭگە) مولشەرىندە ايىپپۇل قاراستىرىلعان. جىل ىشىندە قايتالانعان بۇزۋشىلىقتا ايىپپۇل 20 اەك-كە دەيىن وسەدى نەمەسە جۇرگىزۋشى ءبىر جىلعا جۇرگىزۋ قۇقىعىنان ايىرىلۋى مۇمكىن.
پوليسيا مۇنداي تەكسەرۋلەردىڭ جالعاساتىنىن اتاپ ءوتتى. بۇعان دەيىن ىشكى ىستەر مينيسترلىگى قازاقستانداعى شەتەل ءنومىرلى كولىكتەردىڭ ناقتى سانىن اتاي المادى.