تۇركىستان وبلىسى قازىعۇرت اۋدانىنىڭ تۇرعىندارى بىرنەشە ەلدى مەكەنگە جەتكەن سەلدەن كەيىن باسپاناسىز جانە مالىنان ايىرىلدى. لايلى سۋ بىرنەشە اۋىلدى شارپىپ، ۇيلەر مەن اۋلالاردى سۋ باسىپ، قورالار قيراپ، مال ءولىپ، كوپتەگەن ماسەلە تۋىندادى، دەپ حابارلايدى infohub.kz سايتى.
كتك تەلەارناسىنىڭ دەرەگىنشە، تۇستەن كەيىن اۋداندا بۇرشاق جاۋىپ، ارتىنشا نوسەر باستالعان، سوڭىنان تاۋدان لايلى سۋ اعىنى كەلگەن. بىرنەشە اۋىلدىڭ تۇرعىندارى اپاتتىڭ اۋقىمىن ايتىپ بەردى.
«مىنە، قورانى دا اعىزىپ كەتتى، ءشوپتى دە اعىزىپ كەتتى، سابان دا كەتتى. بۇل سەل — ءبىر پالە عوي. مىنە، نە بولىپ جاتىر. ءبىز ارالدا قالعانداي بولدىق»، — دەيدى جەرگىلىكتى تۇرعىندار.
كۋاگەرلەردىڭ ايتۋىنشا، لايلى سۋ كولىكتەردى اعىزىپ، مال قورالارىن قيراتىپ، ۇيلەردىڭ ىرگەتاسىن شايىپ كەتكەن. ەڭ اۋىر جاعداي قوساعاش تۇرعىندارىنا تۇسكەن. وندا سۋ ءبىر جارىم مەترگە دەيىن كوتەرىلىپ، ءبۇتىن وتباسىلار باسپاناسىز قالعان.
«بۇل ءۇي مۇلدەم جارامسىز بولدى، مال ءولدى، قورا قيرادى. قىسقاسى، وتىراتىن جەر دە جوق. ۇيدە التى ادام تۇرامىز، كەلىنىم ەكىقابات. ەندى كىمگە بارىپ تۇرامىز؟ ەڭ جاقسى دەگەندە ءۇش كۇنگە قابىلدايدى، ودان كەيىن نە بولادى؟» — دەدى تەمىر قۇداكەلدى ۇلى.
سۋ تاسقىنى كۇنىنە كەمىندە مىڭ نان پىسىرەتىن جالعىز دەرلىك ناۋبايحاناعا جەتتى. سۋ جابدىقتى ءبۇلدىردى.
«مەن 25–30 دۇكەندى نانمەن قامتاماسىز ەتەتىنمىن، كۇنىنە مىڭ نان پىسىرەمىن. ادامداردى اسىرايمىن عوي. 40 قاپتىڭ التاۋى عانا ءبۇتىن قالدى. مىنە، قامىر، كەشە عانا قويعانبىز. ءبىراق سۋ كەلىپ، ءبارى ءب ۇلىندى. قورام دا قيرادى. مال دا اعىپ كەتتى، ەكى باس»، — دەيدى جەرگىلىكتى كاسىپكەر.
مۇنداي نوسەردى ادامدار كەمىندە 30 جىلدان بەرى كورمەگەنىن ايتادى. سەبەبى بۇرىن اۋىل اينالاسىندا ارىقتار بولعان، ال ءقازىر ولاردىڭ ايتۋىنشا، ول جەرگە ءۇي سالىنىپ، سۋ بۇراتىن ارنالار جوعالعان. زارداپ شەككەندەر ءبارىن بۇرىنعىداي قايتارۋدى تالاپ ەتەدى.
«ءبىزدىڭ ۇستىمىزدە ارىق بولدى، ۇلكەن ارىق. سۋ سول ارقىلى كەتەتىن. ءقازىر ول ارىق تولىق كومىلگەن: ادامدار كوپىر سالدى، قورا تۇرعىزدى، اعاش وتىرعىزدى. ەندى سايدان كەلە جاتقان سۋ قايدا كەتەدى؟ مەن جوعارىدا كانال قازىپ، سۋ اۋىلدىڭ ەتەگىنە دەيىن اعاتىنداي بولسىن دەپ تالاپ ەتەمىن»، — دەدى ليزا جارقىنبەكوۆا.
ءۇش اۋىلدىڭ تۇرعىندارىنا سۋ تاسقىنىنىڭ سالدارىن جويۋعا ونداعان قۇتقارۋشى كومەكتەستى. تاۋلىكتەن استام ۋاقىت سۋ سورىپ، لاي تازالادى. ءقازىر شەنەۋنىكتەر شىعىندى ەسەپتەپ، زارداپ شەككەندەردىڭ سانىن انىقتاپ جاتىر.
«ءقازىر قالپىنا كەلتىرۋ جۇمىستارى ءجۇرىپ جاتىر. ءبىز بارلىق ءۇيدى ارالاپ شىعامىز، مەن ءوزىم ءار ءۇيدى جەكە قاراپ شىعامىن. ءارى قاراي قوسىمشا جۇمىس كۇشىن تارتامىز. ءقازىر بارلىق اۋىلدىق وكرۋگتەردى جۇمىلدىردىق»، — دەپ ءتۇسىندىردى قازىعۇرت اۋدانى اكىمىنىڭ ورىنباسارى نۇرسۇلتان مەدەۋوۆ.
ول سونداي-اق زارداپ شەككەندەرگە قاجەتتى كومەك كورسەتىلەتىنىن ۋادە ەتتى. سونداي-اق اكىمدىكتە سۋ بۇراتىن ارنالاردى قالپىنا كەلتىرۋ ماسەلەسى قاراستىرىلادى.
بۇعان دەيىن ءبىز تۇركىستان وبلىسى قازىعۇرت اۋدانىنداعى بىرنەشە اۋىلدىڭ قاتتى جاڭبىردان سۋ استىندا قالعانىن جازعانبىز. جاعدايدى اۋداندىق اكىمدىكتە ءتۇسىندىردى.