تۇركىستان وبلىسىنىڭ پروكۋراتۋراسى بىردەن ءۇش ءىرى قىلمىستىق سحەمانى انىقتادى. ۆەدومستۆونىڭ مالىمەتىنشە، جالعان كاسىپورىندار ارقىلى شەتەلگە شامامەن 200 ملرد تەڭگە شىعارىلعان. سونىمەن قاتار، شەكارادا جۇك كولىك جۇرگىزۋشىلەرىنەن اقشا بوپسالاپ، لاۋازىمدى تۇلعالارعا پارا بەرگەن توپ ارەكەت ەتكەن. قىرعىزستاننان قازاقستانعا تەمەكى زاڭسىز اكەلىنگەن — دەپ حابارلايدى infohub.kz.
ەڭ ءىرى سحەما اقشانى زاڭسىز اۋدارۋعا بايلانىستى. ەكونوميكالىق تەرگەۋ دەپارتامەنتى پروكۋراتۋرانىڭ ۇيلەستىرۋىمەن جالعان كومپانيالار ارقىلى 200 ملرد تەڭگەدەي سومانىڭ جاقىن جانە الىس شەت ەلدەرگە اۋدارىلعانىن انىقتادى. تەرگەۋ قىلمىستىق كودەكستىڭ 235-1-بابى بويىنشا جۇرگىزىلۋدە.
ءبىر مەزگىلدە قۇقىق قورعاۋ ورگاندارى شەكارا ماڭىنداعى قىلمىستىق توپتىڭ ارەكەتىن توقتاتتى. بوپسالاۋشىلار جۇك كولىكتەرىنىڭ جۇرگىزۋشىلەرىن توناپ، زاڭسىز دەلدالدىقتان تۇسكەن اقشانىڭ ءبىر بولىگىن لاۋازىمدى تۇلعالارعا پارا رەتىندە بەرگەن. تەرگەۋ سحەماعا قاتىسى بار 23 ادامدى انىقتادى، ونىڭ بەسەۋى قاماۋعا الىندى.
ءۇشىنشى سحەما تەمەكى كونترابانداسىنا قاتىستى. تەمەكى قىرعىزستاننان زاڭسىز اكەلىنىپ، تۇركىستان وبلىسى مەن قازاقستاننىڭ باتىس ايماقتارىندا ساتىلعان. قۇقىق قورعاۋشىلار 103 ملن تەڭگە تۇراتىن تەمەكى ونىمدەرىن تاركىلەدى.
بۇعان دەيىن قازاقستانداعى كونتراباندا سىني دەڭگەيگە جەتكەنى حابارلانعان بولاتىن. الماتى باراحولكاسىنىڭ كولەڭكەلى اينالىمى، نارىق قاتىسۋشىلارىنىڭ باعالاۋىنشا، جىلىنا شامامەن ءۇش ميلليارد دوللاردى قۇرايدى. حالىقارالىق TRACIT ۇيىمىنىڭ بولجامىنشا، زاڭسىز تەمەكىنىڭ ۇلەسى 10%-عا جەتۋى مۇمكىن. سونداي-اق، تولەنبەگەن اكسيزدەر مەن سالىقتار سالدارىنان بيۋدجەت جىل سايىن ونداعان ميلليارد تەڭگە جوعالتادى.