تۇركىستان وبلىسى تولەبي اۋدانىنداعى شۇڭقىلدىق اسۋىندا تۋريست قازا تاپتى، ونىڭ سەرىگىن تجم تىكۇشاعى ەۆاكۋاسيالادى. بۇل تۋرالى infohub.kz سايتى حابارلايدى.
وقيعا اقسۋ-جاباعىلى مەملەكەتتىك تابيعي قورىعىنىڭ تاۋىندا 2400 مەتر بيىكتىكتە بولعان.
كەلىپ تۇسكەن اقپارات بويىنشا، تۋريستەردىڭ ءبىرى كەنەتتەن ءوزىن ناشار سەزىنىپ، كوز جۇمدى. جورىقتىڭ ەكىنشى قاتىسۋشىسى دا دەنساۋلىعىنىڭ ناشارلاعانىن ايتىپ، وزدىگىنەن تۇسە الماعان.
وقيعا ورنىنا تجم بولىمشەلەرى مەن «قازاۆياقۇتقارۋ» اق تىكۇشاعى دەرەۋ جىبەرىلدى. قۇتقارۋشىلار اۆياسيانىڭ كومەگىمەن 1993 جىلى تۋعان ەر ادامدى قول جەتپەيتىن جەردەن ەۆاكۋاسيالادى. جەتكىزىلگەن سوڭ ونى جەدەل جاردەم دارىگەرلەرى قاراپ، قاجەتتى كومەك كورسەتىپ، ۇيىنە جىبەردى — اۋرۋحاناعا جاتقىزۋدىڭ قاجەتى بولمادى. سونىمەن قاتار، قۇتقارۋشىلار 1978 جىلى تۋعان ەر ادامنىڭ ءمايىتىن تاۋدان ءتۇسىردى.
تجم تاۋعا شىعار الدىندا مارشرۋت تۋرالى جاقىندارىنا الدىن الا حابارلاۋ، اۋا رايى بولجامىن باقىلاۋ، بايلانىس قۇرالدارىن، سۋ قورىن، دارى-دارمەك قوبديشاسىن جانە قاجەتتى دارىلەردى الۋ قاجەتتىگىن ەسكەرتتى.
بۇعان دەيىن تۇركىستان وبلىسىنىڭ تاۋىندا ءتۋريستىڭ قۇتقارۋشىلار كەلگەنشە ءۇش كۇن بويى تاماقسىز جانە سۋسىز جارتاستا وتكىزگەنى تۋرالى حابارلانعان بولاتىن.