تۇركىستان وبلىستىق كلينيكالىق اۋرۋحاناسىندا ءبىر كۇندە ەكى وتباسى ءساتتى ترانسپلانتاسيادان كەيىن ۇيلەرىنە شىعارىلدى. ءبىر وتباسىندا باۋىر دونورى ۇلى بولسا، ەكىنشىسىندە انا ءوز بالاسىنا بۇيرەگىن بەردى، دەپ حابارلايدى infohub.kz.
وبلىستىق دەنساۋلىق ساقتاۋ باسقارماسىنىڭ مالىمەتىنشە، وڭىردە اعزا ترانسپلانتاسياسى بويىنشا ەكى وپەراسيا جاسالدى. ءبىرىنشى وتباسىندا 20 جاستاعى جىگىت اناسىنا باۋىرىنىڭ ءبىر بولىگىن بەرىپ، وعان جاڭا ومىرگە جول اشتى. ەكىنشى وتباسىندا انا ۇلىنا ءوز بۇيرەگىنىڭ ءبىرىن بەرىپ، ونىڭ ءومىرىن ەكىنشى رەت سىيلادى.
باسقارمانىڭ دەرەگىنشە، ەكى وپەراسيا دا ءساتتى ءوتتى. كۇردەلى باۋىر ترانسپلانتاسياسى ا.ن. سىزعانوۆ اتىنداعى ۇعوح ءتوراعاسى، پروفەسسور بولاتبەك بايماحانوۆتىڭ جەتەكشىلىگىمەن جوعارى بىلىكتى ماماندار توبىنىڭ قاتىسۋىمەن جاسالدى.
ءقازىر ناۋقاستار ۇيلەرىنە شىعارىلىپ، ۋچاسكەلىك دارىگەرلەردىڭ باقىلاۋىندا. دسب ماماندارى بۇل تاجىريبە وتاندىق دارىگەرلەردىڭ جوعارى كاسىبيلىگىن عانا ەمەس، سونىمەن قاتار جاقىندارىنىڭ ءومىرىن ساقتاپ قالۋ جولىنداعى جانقيارلىعىن كورسەتەتىنىن اتاپ ءوتتى.
بۇعان دەيىن 172 مىڭنان استام قازاقستاندىق eGov ارقىلى قايتىس بولعاننان كەيىنگى دونورلىققا ءوز كوزقاراسىن رەسمي تۇردە بىلدىرگەنى بەلگىلى بولدى. اتاپ ايتقاندا، 156،1 مىڭ ازامات باس تارتقانىن، ال 16،1 مىڭ قازاقستاندىق كەلىسىمىن بەرگەن.
ودان بۇرىن استاناداعى UMC ورتالىعىنىڭ دارىگەرلەرى 60 جاستاعى ناۋقاسقا جۇرەك ترانسپلانتاسياسىن جاساعانى حابارلانعان بولاتىن. دونورلىق اعزا قايتىس بولعان ادامنىڭ تۋىستارى كەلىسىم بەرگەننەن كەيىن بىرنەشە ساعات ىشىندە جەتكىزىلىپ، اۋىستىرىلدى.