تۇركىستان اۋەجايىندا اۋە كەمەسىمەن وقىس جاعداي بولدى: تەحنيكالىق اقاۋعا بايلانىستى ۇشاق اۋەگە كوتەرىلە المادى، دەپ حابارلايدى infohub.kz سايتى.
Kozachkov offside Telegram-ارناسىندا جازىلعانداي، الدىڭعى كۇنى تۇركىستان اۋەجايىنان استاناعا ۇلتتىق ۇلاننىڭ ۇشاعى ۇشۋى ءتيىس ەدى. بورتتا 6 ەكيپاج مۇشەسى مەن 59 اسكەري قىزمەتشى بولعان.
«تەحنيكالىق اقاۋ — قوزعالتقىشتىڭ بىرەۋى ىستەن شىققان، مۇمكىن، ۇشۋ كەزىندە ورىن العان. سونىڭ سالدارىنان اۆتوماتتى تەجەۋ جۇيەسى ىسكە قوسىلىپ، ۇشاقتىڭ ءشاسسيى ورتەنىپ كەتتى. ءورتتى اۋەجايدىڭ ورتكە قارسى قىزمەتى جەدەل ءسوندىردى — 13 ادام مەن 3 تەحنيكا بىرلىگى جۇمىلدىرىلدى. تجم قىزمەتكەرلەرىن ەشكىم شاقىرعان جوق»، — دەلىنگەن جازبادا.
سونداي-اق اۋە كەمەسى ۇشۋ-قونۋ جولاعىندا قالىپ قويعاندىقتان، بىرنەشە رەيس كەشىكتىرىلگەنى، ال ۇشاقتى تەحنيكانىڭ كومەگىمەن الىپ كەتۋگە تۋرا كەلگەنى اتاپ وتىلگەن.
NUR.KZ ءتىلشىسى كولىكتەگى پوليسيا دەپارتامەنتىنەن تۇسىنىكتەمە سۇرادى. ۆەدومستۆودا وقيعا 11 قىركۇيەكتە بولعانىن راستادى.
«تۇركىستان اۋەجايىندا ۇشۋ جولاعىندا اۋە كەمەلەرىنىڭ بىرىندە تەحنيكالىق اقاۋ تۋىندادى. قازىرگى تاڭدا ونى جويۋ جۇمىستارى جۇرگىزىلۋدە»، — دەدى ۆەدومستۆودا.
زارداپ شەككەندەر جوق.