تۇركيانىڭ كەلكيت اۋدانىنىڭ تۇرعىندارى ءبىر ىدىستا 6840 ليتر بۇقتىرىلعان بۇرشاق ءپىسىرىپ، جاڭا الەمدىك رەكورد ورناتتى، دەپ حابارلايدى infohub.kz سايتى.
UPI پورتالىنىڭ جازۋىنشا، گيۋميۋشحانە پروۆينسياسىنىڭ تۇرعىندارى مەن اكىمشىلىگى الدىنا قوس ماقسات قويعان: جەرگىلىكتى قانتتى بۇرشاق سورتىن بۇكىل الەمگە تانىتۋ جانە كەلكيت اۋدانىنىڭ فەرمەرلەرىن قولداۋ.
اسپازدىق جەتىستىك ءۇشىن ينجەنەرلەر ارنايى جوبالاپ، اۆتوماتتى قىزدىرۋ جانە سۋىتۋ جۇيەسى بار الىپ قازان جاسادى. ءبىر اپتا بويى مۋنيسيپاليتەت ماماندارى، مەحانيك-ينجەنەرلەر مەن تەحنولوگتار داستارقان ءدامدى ءارى ءقاۋىپسىز بولۋى ءۇشىن جابدىقتىڭ جۇمىسىن تەكسەردى.
رەكوردتى رەسمي تىركەۋ ساراپشىلاردىڭ قاتاڭ باقىلاۋىمەن ءوتتى. تاۋەلسىز كۋاگەرلەر مەن تاعام ساپاسى جونىندەگى ينجەنەردىڭ قاتىسۋىمەن ماماندار دايىندالعان تاعامنىڭ كولەمىن ولشەدى. رەزەرۆۋار ءداستۇرلى رەسەپت بويىنشا پىسىرىلگەن 6840 ليتر بۇرشاقتى سىيدىردى.
بۇل 2012 جىلى ماكەدونيادا ۇقساس تاعامنىڭ 5600 ءليترى پىسىرىلگەن بۇرىنعى رەكوردتى ايتارلىقتاي اسىپ تۇسۋگە مۇمكىندىك بەردى.
ۇيىمداستىرۋشىلار گيننەس رەكوردتار كىتابىنا ەنۋ جەرگىلىكتى بۇرشاققا حالىقارالىق نارىققا شىعىپ، لايىقتى باعامەن ساتىلۋىنا كومەكتەسەدى دەپ ۇمىتتەنەدى. تۇرعىنداردىڭ وزدەرى وڭىرلەرىنىڭ تاريحتا قالعانىنا ماقتانىش ەتەدى.
رەسمي ولشەۋلەر مەن سەرتيفيكات تاپسىرىلعاننان كەيىن بىردەن مىڭداعان پورسيا ىستىق بۇرشاق مەرەكە قوناقتارىنا تاراتىلدى.