ستامبۋلدىڭ جوعارعى قىلمىستىق سوتى يزرايل پرەمەر-مينيسترى بينيامين نەتانياحۋدى ينتەرپول ارقىلى اسا ءقاۋىپتى قىلمىسكەر رەتىندە حالىقارالىق ىزدەۋگە جاريالادى. بۇل شەشىم 2026 جىلدىڭ 14 شىلدەسىندە، سەيسەنبى كۇنى قابىلداندى، دەپ حابارلايدى infohub.kz.
سوت نەتانياحۋعا تەل-اۆيۆتىڭ گازا سەكتورىنا گۋمانيتارلىق كومەك جەتكىزەتىن فلوتيليانى توقتاتۋىنا بايلانىستى حالىقارالىق تۇتقىنداۋ وردەرىن شىعارۋدى ۇيعاردى. بۇل — گازاعا كومەك جەتكىزۋگە تىرىسقان Global Sumud Flotilla گۋمانيتارلىق فلوتيلياسى.
ءساۋىر ايىندا ستامبۋل پروكۋراتۋراسى نەتانياحۋدى قوسا العاندا، 35 ادامعا قاتىستى فلوتيليا كەمەلەرىن قارۋلى باسىپ الۋ ءىسى بويىنشا ايىپتاۋ قورىتىندىسىن جاريالادى. نەتانياحۋدان بولەك، ايىپتالۋشىلار قاتارىندا يزرايل قورعانىس ءمينيسترى يسراەل كاس، ونىڭ الدىنداعى ارىپتەسى يواۆ گالانت، ۇلتتىق قاۋىپسىزدىك ءمينيسترى يتامار بەن-گۆير، باس شتاب باستىعى ەيال زامير جانە باسقالار بار.
ولارعا «ادامزاتقا قارسى قىلمىستار»، «گەنوسيد»، «باس بوستاندىعىنان ايىرۋ»، «دەنساۋلىققا قاساقانا زيان كەلتىرۋ»، «ازاپتاۋ»، «توناۋ»، «م ۇلىكتى جويۋ نەمەسە ءبۇلدىرۋ» جانە «كولىك قۇرالىن باسىپ الۋ» ايىپتارى تاعىلدى. پروكۋراتۋرا بارلىق ايىپتالۋشىلارعا ءومىر بويى باس بوستاندىعىنان ايىرۋ جازاسىن تاعايىنداۋدى تالاپ ەتتى.
مامىردا تۇركيا پرەزيدەنتى رەجەپ تايىپ ەردوعان نەتانياحۋعا جاقىن ارادا بۇكىل مۇسىلمان الەمىنەن «ساباق الاتىنىن» ەسكەرتتى.
يزرايل تاراپى ايىپتاۋلاردى جوققا شىعارادى. تەل-اۆيۆتىڭ پىكىرىنشە، Global Sumud فلوتيلياسىن تۇركيا گازا سەكتورىنىڭ تەڭىز بلوكاداسىن بۇزۋدىڭ تاعى ءبىر ارەكەتى رەتىندە دايىنداعان.