تۇركيانىڭ كەيبىر وڭىرلەرىندە اۋا تەمپەراتۋراسى +50°C-قا دەيىن جەتۋى مۇمكىن. تۋريستەرگە كۇندىزگى ۋاقىتتا كوشەدە بولماۋ ۇسىنىلادى، دەپ حابارلايدى infohub.kz سايتى.
«اسىرەسە ەگەي جانە جەرورتا تەڭىزدەرى ايماقتارىندا اۋا تەمپەراتۋراسى +50°C-قا دەيىن سەزىلەدى. تۋريستەر مەن ءقاۋىپ توبىنداعى ادامدار ساعات 11:00-دەن 16:00-گە دەيىن كوشەگە شىقپاۋى كەرەك»، — دەدى تۇرىك تەراپەۆتى ديلەك شەنگيۋل.
ساراپشى كۇندىزگى ۋاقىتتا كۇن استىندا ۇزاق بولۋ كۇن ۇرۋعا، سۋسىزدانۋعا جانە سوزىلمالى اۋرۋلاردىڭ ورشۋىنە اكەلۋى مۇمكىن ەكەنىن ەسكەرتتى. ونىڭ ايتۋىنشا، ەگدە جاستاعى ادامدار، جۇكتى ايەلدەر، بالالار جانە جۇرەك-قان تامىرلارى اۋرۋلارى بار ادامدار ەرەكشە ساقتىق شارالارىن قولدانۋى قاجەت.
شەنگيۋل سونداي-اق تۋريستەرگە ەڭ ىستىق ساعاتتاردا ءۇي ىشىندە بولۋدى، جەتكىلىكتى مولشەردە سۋ ءىشۋدى، اقشىل ءتۇستى جەڭىل كيىم كيۋدى جانە باس كيىمدى ۇمىتپاۋدى كەڭەس بەردى.
سوڭعى اپتالاردا تۇركيا تۇراقتى ىستىق تولقىنىنىڭ اسەرىندە. ەڭ جوعارى تەمپەراتۋرا وڭتۇستىك-شىعىس پروۆينسيالاردا تىركەلۋدە، الايدا ىستىق ەگەي جانە جەرورتا تەڭىزى جاعالاۋىنداعى تانىمال تۋريستىك ايماقتاردى دا قامتىپ جاتىر.