قازاقستاندا تۇرعىن ءۇي كەزەگىن ساتۋعا بايلانىستى جانجال ءورشىپ تۇر. «وتباسى بانكى» باسشىسى ءلاززات يبراگيموۆا ۇكىمەتتەگى بريفينگتە بانك قىزمەتكەرلەرىنىڭ اقىلى تۇردە ادامداردى تۇرعىن ءۇي كەزەگىندە ىلگەرىلەتكەنى تۋرالى جاعدايعا تۇسىنىكتەمە بەردى، دەپ حابارلايدى infohub.kz سايتى.
ءلاززات يبراگيموۆا بانك قىزمەتكەرلەرىنىڭ تۇرعىن ءۇي كەزەگىندە ىلگەرىلەتۋ سياقتى زاڭسىز قىزمەتتەر كورسەتكەنىن راستادى. ول بانكتىڭ بۇزۋشىلىقتاردى ءوزى انىقتاپ، بۇل تۋرالى حابارلاعانىن اتاپ ءوتتى. «بۇل جەكەلەگەن جاعداي بولدى. ول 2025 جىلدىڭ ءساۋىر-مامىر ايلارىندا ورىن الدى. ادام كەزەكتە تۇردى، ءبىراق نەعۇرلىم جەڭىلدىكتى ساناتقا ءوتۋ ءۇشىن ءوز ساناتىن "مۇگەدەكتىگى بار بالالاردى تاربيەلەپ وتىرعان وتباسىلار" دەپ وزگەرتكەن. اتالعان ەكى قىزمەتكەرمەن ەڭبەك شارتى بانك باستاماسىمەن توقتاتىلىپ، ولاردى قىلمىستىق جاۋاپكەرشىلىككە تارتۋ تۋرالى وتىنىشتەر جولداندى. قىلمىستىق ىستەر قوزعالىپ، ءقازىر تەرگەۋ ءجۇرىپ جاتىر. بۇل ءبىر ايماقتىق فيليال قىزمەتكەرلەرى مەن ورتالىق اپپاراتتىڭ بيزنەس-تالداۋشىسى تاراپىنان جاسالعان الاياقتىق ارەكەتتەر تۋرالى بولىپ وتىر»، — دەدى ول.
يبراگيموۆانىڭ ايتۋىنشا، بۇل وقيعا بانكتىڭ جاڭا اقپاراتتىق جۇيەگە كوشۋىنە دەيىن بولعان. «ءبىز ءۇشىن بۇل ۇلكەن ساباق بولدى: سيفرلاندىرۋ كەزىندە بارلىق سيفرلىق ىزدەر — كىم، قانداي لوگينمەن كىرگەن، نە ىستەگەن — ساقتالۋى ءۇشىن وراسان زور جۇمىس ىستەۋ قاجەت. ەشقانداي زالال كەلتىرىلگەن جوق، بولىنگەن پاتەر نەسيە شارتىنا قول قويۋ ساتىسىندا توقتاتىلىپ، قايتارىلدى. ول قايتادان تۇرعىن ءۇي بولۋگە قاتىستى»، — دەپ ءتۇسىندىردى سپيكەر.
ەسكە سالايىق، بۇعان دەيىن يبراگيموۆا مەملەكەتتىك قوردان كەزەكتە تۇرعانداردى تۇرعىن ۇيمەن قامتاماسىز ەتۋ قارقىنى تۋرالى ايتقان بولاتىن.