قازاقستان ىشكى ىستەر مينيسترلىگى ۇلتتىق قاۋىپسىزدىك كوميتەتىمەن جانە شەتەلدىك ارىپتەستەرىمەن بىرلەسىپ جۇرگىزگەن اۋقىمدى، كوپ ساتىلى ارنايى وپەراسيا ترانسۇلتتىق ۇيىمداسقان قىلمىستىق توپتىڭ ارەكەتىن توقتاتۋعا مۇمكىندىك بەردى. باندا مۇشەلەرىن ۇستاۋ ءبىر مەزگىلدە ءۇش مەملەكەت اۋماعىندا جۇرگىزىلدى، دەپ حابارلايدى infohub.kz سايتى.
قازاقستان، گرۋزيا، تۇركيا جانە ءازىربايجان ارنايى قىزمەتتەرىنىڭ بىرلەسكەن جۇمىسىن جانداندىرۋعا ىشكى ىستەر ءمينيسترى باستاعان قازاقستاندىق دەلەگاسيالاردىڭ رەسمي ساپارلارى سەبەپ بولدى. جەدەل بايلانىس ارنالارى ستامبۋلدا اتىلعان قازاقستان ازاماتى يسمايلوۆتىڭ ءولىمىن اشۋعا مۇمكىندىك بەردى.
تەرگەۋ بارىسىندا ءۇش ەلدىڭ پوليسەيلەرى كىسى ءولتىرۋدىڭ ەكى ورىنداۋشىسىن جەدەل ۇستاپ، قىلمىس سەبەبىن، سونداي-اق ونى ۇيىمداستىرۋشى مەن تاپسىرىس بەرۋشىنى انىقتادى. باندا كوشباسشىلارى — ترانسۇلتتىق قىلمىستىق ورتانىڭ وكىلدەرى، ءقازىر حالىقارالىق ىزدەۋدە.
وسى تەرگەۋ بارىسىندا الىنعان اقپارات قۇقىق قورعاۋ ورگاندارىنا قازاقستان ىشىندەگى باسقا دا اۋىر قىلمىستار تىزبەگىن اشۋعا كومەكتەستى. توپتى جۋرناليست ايەلدى ولتىرۋگە وقتالعانى ءۇشىن اقش تۇرمەسىندە جازاسىن وتەپ جاتقان كريمينالدىق بەدەل ادام باسقارعانى انىقتالدى.
وڭتۇستىك استانادا جەدەل قىزمەتكەرلەر جەكە دياسپورالىق توپتاردىڭ بيزنەسىنە اسەر ەتۋگە تىرىسقان توپتىڭ جاۋىنگەرلىك قاناتىن زالالسىزداندىردى. «الماتى قالاسىندا اتالعان قىلمىستىق قۇرىلىمعا قاتىسۋشىلاردان بىرنەشە قارۋلى شابۋىل جاساۋعا قاتىسى بار دەپ ايىپتالعان ادامدار توبى ۇستالدى»، — دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.
الماتىدا ۇستالعانداردىڭ اراسىندا 2025 جىلعى تامىزدا جەرگىلىكتى تۇرعىنعا ءولتىرۋ ارەكەتىن جاساعان كىللەر بولدى. ودان قىلمىس قۇرالى — تاپانشا الىندى. بۇل ءىس بويىنشا تەرگەۋ اياقتالدى، ماتەريالدار سوتقا جىبەرىلدى. سونىمەن قاتار، ۇيىمداسقان قىلمىستىق توپپەن بايلانىستى جاڭا تۇلعالار گرۋزيا اۋماعىندا ۇستالدى.
ءىىم توپتىڭ جويىلۋى شەتەلدەن كەلەتىن قىلمىستىق ىقپال ارنالارىن تولىعىمەن توقتاتۋعا مۇمكىندىك بەرگەنىن اتاپ ءوتتى. ءقازىر پوليسيا دالەلدەمەلەردى جيناۋدى جانە باندا ۇيىمداستىرۋشىسىن جاۋاپكەرشىلىككە تارتۋ جۇمىسىن جالعاستىرۋدا.