قازاقستان ۇكىمەتى اباي وبلىسىنداعى كۋرچاتوۆ قالاسىندا قۋاتى 700 مەگاۆاتت كوندەنساسيالىق ەلەكتر ستانسياسىن سالۋدى كوزدەيتىن ينۆەستيسيالىق كەلىسىمدى ماقۇلدادى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى، دەپ حابارلايدى infohub.kz سايتى.
جوبانى «گرەس كۋرچاتوۆ» جاۋاپكەرشىلىگى شەكتەۋلى سەرىكتەستىگى ق ر ەنەرگەتيكا مينيسترلىگىمەن بىرلەسىپ جۇزەگە اسىرادى. جاڭا ستانسيانىڭ قۇنى 881 ميلليارد تەڭگەنى قۇرايدى. ءارقايسىسى 350 مەگاۆاتت بولاتىن ەكى ەنەرگوبلوكتى كەزەڭ-كەزەڭىمەن 2032 جىلعا دەيىن ىسكە قوسۋ جوسپارلانعان. ىسكە قوسىلعاننان كەيىن نىسان جىلىنا بەس ميلليارد كيلوۆاتت-ساعاتقا دەيىن ەلەكتر ەنەرگياسىن وندىرە الادى. سونىمەن قاتار، جوبانى ىسكە اسىرۋ شامامەن 4،4 مىڭ جۇمىس ورنىن قۇرۋدى قامتاماسىز ەتەدى.
جاڭا ەلەكتر ستانسياسى ۇلتتىق يادرولىق ورتالىق، يادرولىق تەحنولوگيالار پاركى، زەرتتەۋ رەاكتورلارى، زەرتحانالار مەن قازاقستاندىق تەرمويادرولىق توكاماك قتم ورنالاسقان كۋرچاتوۆ قالاسى ءۇشىن قوسىمشا ەنەرگيانىڭ نەگىزگى كوزىنە اينالۋعا ءتيىس. ستانسيادا زاماناۋي بۋ-كۇش جابدىقتارى مەن «تازا كومىر» تەحنولوگيالارىن قولدانۋ جوسپارلانۋدا. زياندى شىعارىندىلاردى ازايتۋ ءۇشىن گاز تازارتۋ، ءسۇزۋ جانە شاڭ باسۋ جۇيەلەرى قاراستىرىلعان.
جوبا قالانى ەلەكترمەن جابدىقتاۋدىڭ سەنىمدىلىگىن ارتتىرىپ، عىلىمي، ونەركاسىپتىك جانە قالالىق ينفراقۇرىلىمدى دامىتۋعا قوسىمشا قۋاتتار جاسايدى دەپ كۇتىلۋدە. بۇعان دەيىن كۋرچاتوۆ ەلىمىزدەگى العاشقى اتوم ەلەكتر ستانسياسىن سالۋعا ىقتيمال الاڭ رەتىندە قاراستىرىلعانى، الايدا كەيىن ەنەرگەتيكا مينيسترلىگىندە 700 مەگاۆاتتتىق كومىر جىلۋ ەلەكتر ورتالىعىن سالۋ تۋرالى شەشىم قابىلدانعانى حابارلانعان بولاتىن.