ۋكراينانىڭ بۇرىنعى قورعانىس ءمينيسترى ميحايل فەدوروۆ ازاماتتارعا بەينەۇندەۋ جاساپ، اسكەري قاقتىعىس اياقتالعانعا دەيىن پرەزيدەنتتىك سايلاۋ وتكىزۋدى ۇسىندى، دەپ حابارلايدى infohub.kz.
فەدوروۆتىڭ ايتۋىنشا، سوعىس ۋاقىتىندا سايلاۋ وتكىزۋگە مۇمكىندىك بەرەتىن تەتىكتى تابۋ قاجەت. ول رەسەي ۋكرايندىقتاردىڭ ءوز بيلىگىن قايتا سايلاي الاتىن ۋاقىتىن انىقتاي المايتىنىن اتاپ ءوتتى.
«دەموكراتيا رەسەيدىڭ كەپىلىنە اينالا المايدى. ءبىز ءدال ءقازىر سوعىسىپ جاتىرمىز، ويتكەنى ەركىن ەۋروپالىق مەملەكەت بولىپ قالعىمىز كەلەدى. سوندىقتان ءبىز ۇزاققا سوزىلعان سوعىس جاعدايىندا دا ۋكراينانىڭ تولىققاندى دەموكراتيالىق پروسەستى قايتا باستاۋىنا مۇمكىندىك بەرەتىن زاڭدى، ءقاۋىپسىز جانە شىنايى تەتىكتى تابۋىمىز كەرەك»، — دەدى ەكس-مينيستر.
فەدوروۆ اسكەري قىزمەتشىلەرگە، شەتەلدەگى ميلليونداعان ۋكرايندىقتارعا جانە مايدان شەبىندەگى ايماقتاردىڭ تۇرعىندارىنا داۋىس بەرۋ قۇقىعىن قامتاماسىز ەتۋ قاجەتتىگىن اتاپ ءوتتى. ول سايلاۋ پروسەسىنىڭ قاۋىپسىزدىگىن، ينستيتۋتتاردىڭ تاۋەلسىزدىگىن جانە ناتيجەلەرگە سەنىمدىلىكتى مىندەتتى شارتتار دەپ اتادى.
«ادامدار بەلگىلى ءبىر شەشىمدەردىڭ نەگە قابىلداناتىنىن، نەگە كەيبىر رەفورمالار العا جىلجىپ، ال باسقالارى بۇعاتتالاتىنىن، مايداندا بۇگىن قاجەت شەشىمدەردىڭ نەگە ايلار بويى كابينەتتەردى ارالاپ جۇرگەنىن بىلمەيتىن مەملەكەتتە شەكسىز ءومىر سۇرە المايدى»، — دەپ قوستى ول.
فەدوروۆتىڭ بەينەۇندەۋى ۆلاديمير زەلەنسكيدىڭ ەۆگەني حمارانى قورعانىس ءمينيسترى ەتىپ تاعايىنداعانىنان بىرنەشە ساعات وتكەن سوڭ جاريالاندى.
ەسكە سالايىق، قاڭتاردا سول كەزدەگى سيفرلىق ترانسفورماسيا ءمينيسترى قىزمەتىن اتقارعان ميحايل فەدوروۆ پەن قورعانىس ءمينيسترى دەنيس شمىگال وتستاۆكاعا ءوتىنىش بەرگەن ەدى. كوپ ۇزاماي زەلەنسكي فەدوروۆقا قورعانىس مينيسترلىگىن باسقارۋدى ۇسىنىپ، ونىڭ ۇشقىشسىز اپپاراتتارمەن جۇمىسىن جانە مەملەكەتتىك قىزمەتتەردى سيفرلاندىرۋداعى جەتىستىكتەرىن اتاپ ءوتتى.
جوعارعى رادا فەدوروۆتى قورعانىس ءمينيسترى قىزمەتىنە بەكىتتى، الايدا شىلدە ايىندا ول وسى قىزمەتتەگى جۇمىسىنىڭ اياقتالعانىن راستاپ، قورىتىندى جاساپ، ميسسياسىن جالعاستىراتىنىن مالىمدەدى.
بۇعان دەيىن، اقپان ايىندا Financial Times زەلەنسكي اقش-تىڭ قىسىمىنا بايلانىستى 15 مامىرعا دەيىن سايلاۋ مەن رەفەرەندۋم وتكىزۋ جوسپارلارىن جاريالاۋى مۇمكىن دەپ حابارلاعان بولاتىن. كەيىن ۋكراين پرەزيدەنتى بۇل قاۋەسەتتەردى جوققا شىعاردى.