ۋكراينا حالىقارالىق ازاماتتىق اۆياسيا ۇيىمىنا (يكاو) رەسەي اۋە كەڭىستىگىنىڭ ازاماتتىق رەيستەر ءۇشىن ءقاۋىپسىز ەمەستىگىن رەسمي تۇردە حابارلادى. بۇل شەشىم پرەزيدەنت ۆلاديمير زەلەنسكيدىڭ اۆياكومپانيالارعا ۇندەۋىنەن كەيىن قابىلداندى، دەپ حابارلايدى infohub.kz سايتى.
Euronewsء-تىڭ جازۋىنشا، ۋكراينا سىرتقى ىستەر ءمينيسترى اندرەي سيبيگا يكاو-عا جىبەرىلگەن حابارلاما تۋرالى مالىمدەدى. ول الەۋمەتتىك جەلىدەگى پاراقشاسىندا: «ۋكراينا يكاو-عا رەسەي اۋە كەڭىستىگىنىڭ اسكەري بەلسەندىلىكتىڭ ارتۋىنا بايلانىستى ازاماتتىق اۆياسيا ءۇشىن ءقاۋىپسىز ەمەستىگىن رەسمي حابارلادى. ءبىز بارلىعىن ودان اۋلاق بولۋعا شاقىرامىز»، — دەپ جازدى.
ءمينيستردىڭ ايتۋىنشا، ماسكەۋ «قولدانىستاعى قاۋىپتەردى ادەيى ەلەمەيدى». سيبيگا: «بۇل — يكاو-عا، بارلىق اۆياكومپانيالار مەن ۇكىمەتتەرگە ساقتىق شارالارىن ساقتاۋ ءۇشىن حابارلاۋ — ءبىزدىڭ جاۋاپتى شەشىمىمىز، ءتىپتى رەسەي ءوز مىندەتىن ورىنداپ، ولاردى حاباردار ەتۋدەن باس تارتسا دا. ءبىز ادەيى جاسالماعان وقيعالاردىڭ الدىن العىمىز كەلەدى»، — دەپ قوستى.
ريا ءنوۆوستيدىڭ حابارلاۋىنشا، حالىقارالىق ازاماتتىق اۆياسيا ۇيىمى كيەۆتىڭ رەسەي اۋە كەڭىستىگىنە قاتىستى مالىمدەمەلەرىنە جاۋاپ بەردى. وندا حالىقارالىق ازاماتتىق اۆياسيا تۋرالى كونۆەنسيا يكاو-عا مۇشە بارلىق مەملەكەتتەردى ازاماتتىق اۋە كەمەلەرىنىڭ قاۋىپسىزدىگىن قامتاماسىز ەتۋگە مىندەتتەيتىنىن ەسكە سالدى. ۇيىمدا: «حالىقارالىق ازاماتتىق اۆياسيا تۋرالى كونۆەنسيا يكاو-عا مۇشە بارلىق مەملەكەتتەردى ازاماتتىق اۋە كەمەلەرىنىڭ قورعالۋىن قامتاماسىز ەتۋگە مىندەتتەيدى جانە ولارعا قارسى قارۋ قولدانۋعا تىيىم سالادى»، — دەپ اتاپ ءوتتى.
بۇعان دەيىن ۋكراينا پرەزيدەنتى ۆلاديمير زەلەنسكي Telegram-ارناسىندا ۋكراينا قارۋلى كۇشتەرىنىڭ شابۋىلدارىنا بايلانىستى رەسەي ۇستىندەگى اۋە كەڭىستىگى ءقاۋىپسىز ەمەس بولىپ بارا جاتقانىن مالىمدەگەن ەدى.