رەسەي زىمىرانى ۋكراينانىڭ ورتالىق بولىگىندەگى كريۆوي روگ قالاسىنىڭ ماڭىنداعى اۋىلداعى جەكە ۇيگە سوققى بەردى. كريۆوي روگ اسكەري اكىمشىلىگىنىڭ باسشىسى الەكساندر ۆيلكۋلدىڭ ايتۋىنشا، ۆورونەج وبلىسىنان ۇشىرىلعان «يسكاندەر-م» بالليستيكالىق زىمىرانى ءۇيدى قيراتىپ، 5 جانە 12 جاستاعى ەكى قىز بەن ءتورت ەرەسەك ادام قازا تاپتى. تاعى سەگىز ادام جارالاندى، قازا تاپقاندار سانى ارتۋى مۇمكىن. بۇل تۋرالى infohub.kz حابارلايدى.
كيەۆتە ءبىر ادامنىڭ قازاسىن قالا اسكەري اكىمشىلىگى راستادى. مەر ۆيتالي كليچكونىڭ ايتۋىنشا، بىرنەشە اۋداندا ءورت شىققان. ول بۇعان دەيىن Telegram-دا: «جاۋ استاناعا بالليستيكالىق قارۋمەن شابۋىل جاساپ جاتىر. شابۋىل ءقاۋپى ساقتالىپ تۇر. باسپانالاردا بولىڭدار!» – دەپ جازدى.
باتىستاعى لۆوۆ قالاسىنىڭ مەرى اندرەي سادوۆىي Telegram-دا رەسەيلىك اۋە شابۋىلىنان تۇرعىن ۇيلەردىڭ زاقىمدانعانىن حابارلاپ، ادامداردى باسپانا ىزدەۋگە شاقىردى.
سارسەنبى كۇنى كەشكە ۋكراينا پرەزيدەنتى ۆلاديمير زەلەنسكي Telegram-دا: «ورىستار بىرنەشە كۇن بۇرىن جاپپاي شابۋىلعا دايىندالدى جانە بۇگىن تۇندە سوققى بەرىلۋ ىقتيمالدىعى جوعارى... ۋكراينانىڭ بارلىق وڭىرلەرىندە اۋە شابۋىلى دابىلىنا ءمان بەرىپ، ءقاۋىپسىز جەردە بولىڭىزدار»، – دەپ جازدى.
شابۋىل كەزىندە ۋكراينامەن شەكارالاس پولشا اۋە كەڭىستىگىن قورعاۋ ءۇشىن جويعىش ۇشاقتارىن كوتەردى. پولشا قارۋلى كۇشتەرىنىڭ مالىمدەۋىنشە، «جويعىش ۇشاقتار مەن ەرتە حابارلاۋ ۇشاعى ارەكەت ەتە باستادى، جەردەگى اۋە قورعانىس جۇيەلەرى مەن رادارلىق بارلاۋ جۇيەلەرى دايىندىق كۇيىنە كەلتىرىلدى».
زەلەنسكي ۋكراينانىڭ وداقتاستارىنا كيەۆتىڭ اۋە قورعانىسىنا جەتىسپەيتىن زىمىرانداردى بەرۋ تۋرالى ءوتىنىشىن قايتالادى. «ءبىزدىڭ ارىپتەستەرىمىز نە بولىپ جاتقانىن تولىق ءتۇسىنۋى ماڭىزدى، ادامداردىڭ ءومىرىن قورعاۋ تىكەلەي ولاردىڭ اۋە قورعانىسى زىمىراندارىن بەرۋگە دايىن نەمەسە دايىن ەمەستىگىنە بايلانىستى»، – دەدى ول.
ال رەسەيدىڭ باتىسىنداعى پەنزا قالاسىندا Wildberries ينتەرنەت-دۇكەنىنىڭ قويماسى ۋكرايندىق درون شابۋىلىنان ورتەندى. وبلىس اكىمى ولەگ مەلنيچەنكونىڭ ايتۋىنشا، ءبىر ادام جارالانىپ، 200-گە جۋىق ادام ەۆاكۋاسيالانعان.