كيەۆتە رەسەي مەن اقش-پەن قاقتىعىستى رەتتەۋ ءۇشىن كەلىسسوزدەر جۇرگىزۋگە دايىن ەكەنىن راستادى، دەپ حابارلايدى infohub.kz.
ۋكراينا پرەزيدەنتى ۆلاديمير زەلەنسكيدىڭ كەڭسەسى باسشىسىنىڭ ورىنباسارى سەرگەي كيسليسا «ۋكرينفورم» اگەنتتىگىنە بەرگەن سۇحباتىندا ۋكراين تاراپىنىڭ ديالوگقا اشىق ەكەنىن ايتتى. «ءبىز اشىق ايتتىق جانە ايتىپ كەلەمىز: ءبىز كەلىسسوزدەر ۇستەلىنە وتىرۋعا دايىنبىز، امەريكاندىق تاراپتى تىڭداۋعا، رەسەيلىكتەرمەن سويلەسۋگە جانە بۇل سوعىستىڭ نەگە توقتاۋى كەرەك ەكەندىگىنە دالەلدەرىمىزدى جەتكىزۋگە دايىنبىز»، — دەپ اتاپ ءوتتى ول.
كيسليسا ديپلوماتيا «كەز كەلگەن جاعدايدا» جۇمىس ىستەۋى كەرەك ەكەنىن، ال ديپلوماتيالىق جۇمىستى توقتاتۋ «قاتە جانە ءقاۋىپتى بولار ەدى» دەپ مالىمدەدى. ول سونداي-اق اقش پرەزيدەنتىنىڭ ارنايى وكىلى ستيۆەن ۋيتكوفف پەن اق ءۇي باسشىسىنىڭ كەڭەسشىسى، دونالد ترامپتىڭ كۇيەۋ بالاسى دجارەد كۋشنەردىڭ كيەۆكە ىقتيمال ساپارى تۋرالى ماسەلەنى وزەكتى دەپ اتادى. ونىڭ ايتۋىنشا، ولار كەلۋگە ۋادە بەرگەن، ءبىراق ساپار كەيىنگە شەگەرىلگەن. «الدىمەن 1 ساۋىرگە ۋادە بەردى، كەيىن ستيۆ ۋيتكوفف 28 شىلدەدە اق ۇيدەگى كەزدەسۋدە بولعاندا، تاعى ۋادە بەردى. كورەمىز... ءبىز ءدال امەريكاندىق تاراپ وسى كەلىسسوز پروسەسىنىڭ قارقىندىلىعىنا ناقتى اسەر ەتە الادى دەپ ەسەپتەيمىز، سوندىقتان ولارعا سەنەمىز»، — دەدى كيسليسا.
ول ۋكراين تاراپى ۋيتكوفف پەن كۋشنەرمەن ۇنەمى بايلانىستا ەكەنىن، الايدا «اشىق نەمەسە جابىق بايلانىستا تالقىلاۋعا بولمايتىن ماسەلەلەر» بار ەكەنىن اتاپ ءوتتى. وسىعان بايلانىستى «ءبىر-بىرىنىڭ كوزىنە قاراپ وتىرىپ، سويلەسۋ كەرەك»، — دەپ قوستى ول.
سونىمەن قاتار، رەسەي پرەزيدەنتىنىڭ ءباسپاسوز حاتشىسى دميتري پەسكوۆ ۋكرايناداعى قاقتىعىستى بەيبىت جولمەن رەتتەۋ مۇمكىندىگى قازىرگى كەزەڭدە جوققا شىعارىلاتىنىن مالىمدەدى. «قازىرگى ۋاقىتتا كيەۆتىڭ ۇستانىمىنا بايلانىستى بەيبىت رەتتەۋ تۇرعىسىنان وپتيميزمگە ەشقانداي نەگىز جوق، مايدانداعى جاعداي بەلگىلى»، — دەدى ول جۋرناليستەرمەن كەزدەسۋدە.