استانادا 24 تامىزدا اتاپ وتىلگەن ۋكراينانىڭ تاۋەلسىزدىك كۇنىندە جاس ۋكراينالىق دومبىرادا كۇي تارتىپ، الەۋمەتتىك جەلىلەردە ۇلكەن قىزىعۋشىلىق تۋدىردى، دەپ حابارلايدى infohub.kz سايتى.
بالانىڭ ونەرىن ونىڭ اناسى الەۋمەتتىك جەلىگە جاريالاعان. ونىڭ ايتۋىنشا، وتباسى قازاقستانعا كەلگەندە ۇلى دومبىراعا قىزىعىپ، وسى اسپاپتا ويناۋدى ۇيرەنگىسى كەلگەن.
«عاجايىپ اسپاپ — نەبارى ەكى ىشەك، ال اۋەنى قانداي ادەمى»، — دەپ ءبولىستى ايەل.
پايدالانۋشىلار پىكىرلەرىندە بالانىڭ ويىنىن جوعارى باعالاپ، قازاق مادەنيەتىنە دەگەن قۇرمەتى ءۇشىن العىس ءبىلدىردى. پىكىرلەردىڭ اراسىندا: «ءسىزدىڭ ۇلىڭىز مەنەن گورى قازاق»، «مۋزىكا ۇلت تاڭدامايتىن سياقتى. ەستۋ قابىلەتى دامىعان ادام كەز كەلگەن اسپاپتا ويناۋدى ۇيرەنە الادى. ءسىزدىڭ بالاڭىزدا تابيعي تالانت بار»، «تاماشا! ۋكراينداردىڭ دومبىراعا ەرەكشە ىقىلاسى بار. مەنىڭ اكەم ديريجەر بولعان، فورتەپيانو مەن گيتارادا ويناعان. ءبىراق دومبىرا ونىڭ سۇيىكتى اسپابى ەدى» دەگەن پىكىرلەر بار.
بالا كومپوزيتور ءابدىمومىن جەلدىباەۆتىڭ «ەركە سىلقىم» كۇيىن ورىندادى. بۇل شىعارما قازاق قىزدارىنىڭ سۇلۋلىعى مەن اۆتوردىڭ جاۋاپسىز ماحابباتىنا ارنالعان.
بۇعان دەيىن قازاقستاندا جارتى ميلليونعا جۋىق بالا ءبىر ۋاقىتتا دومبىرادا كۇي تارتقان اكسيا وتكەنى حابارلانعان بولاتىن.