ۇيقىنىڭ جەتىسپەۋشىلىگى بالا ءۇشىن قاراپايىم وقۋ كۇنىن دە ناعىز سىناققا اينالدىرۋى مۇمكىن. دەنساۋلىق ساقتاۋ مينيسترلىگى وقۋشىلارعا قانشا ساعات ۇيقى قاجەت ەكەنىن ەسكە سالىپ، قازاقستاندىق اتا-انالارعا ۇسىنىستار بەردى، دەپ حابارلايدى infohub.kz سايتى.
دارىگەرلەردىڭ ايتۋىنشا، ۇيقىنىڭ ۇزاقتىعى جاسىنا تىكەلەي بايلانىستى. 6 بەن 12 جاس ارالىعىنداعى بالالارعا تاۋلىگىنە 9–12 ساعات، ال 13 پەن 18 جاس ارالىعىنداعى جاسوسپىرىمدەرگە 8–10 ساعات ۇيىقتاۋ ۇسىنىلادى. دەگەنمەن، تەك ۇزاقتىعى عانا ەمەس، تۇراقتىلىعى دا ماڭىزدى: بالانىڭ شامامەن ءبىر ۋاقىتتا ۇيىقتاپ، ءبىر ۋاقىتتا ويانۋى ءجون.
تولىققاندى دەمالىس زەيىنمەن، ەستە ساقتاۋ قابىلەتىمەن جانە جاڭا اقپاراتتى مەڭگەرۋمەن تىعىز بايلانىستى. ۇيقىسى قانعان بالاعا ساباققا زەيىن قويۋ جانە وقۋ جۇكتەمەسىن جەڭۋ الدەقايدا وڭاي.
ءبىرىنشى سىنىپ وقۋشىلارىنا ەرەكشە نازار اۋدارعان ءجون. جاڭا كۇن ءتارتىبى، ەرتە تۇرۋ، ساباقتار جانە جاڭا اسەرلەردىڭ كوپتىگى بەيىمدەلۋ ۋاقىتىن قاجەت ەتەدى. ەگەر بالا تەز شارشاسا، وقۋدىڭ العاشقى اپتالارىندا وعان ەكى ساعاتقا دەيىنگى قوسىمشا كۇندىزگى دەمالىس ۇيىمداستىرۋعا بولادى.
ەگەر جاز بويى بالا ءتۇن ورتاسىنان كەيىن ۇيىقتاپ، تۇسكە جاقىن ويانۋعا داعدىلانسا، كەستەنى كۇرت وزگەرتۋدىڭ قاجەتى جوق. ۇيقىعا كەتۋ جانە ويانۋ ۋاقىتىن بىرتىندەپ ەرتەرەك اۋىستىرعان دۇرىس. ماماندار بىرنەشە قاراپايىم ەرەجەنى ۇستانۋعا كەڭەس بەرەدى: بالانى شامامەن ءبىر ۋاقىتتا ۇيىقتاتىپ، ءبىر ۋاقىتتا وياتۋ؛ ۇيقىعا دەيىن بىرنەشە ساعات بۇرىن بەلسەندى ويىنداردى ازايتۋ؛ كەشكە سمارتفون، پلانشەت جانە كومپيۋتەردى پايدالانۋدى شەكتەۋ؛ گادجەتتەردى تىنىش ىستەرمەن — كىتاپ وقۋ، سەرۋەندەۋ نەمەسە سويلەسۋمەن الماستىرۋ؛ ۇيىقتار الدىندا بولمەنى جەلدەتىپ، قولايلى تەمپەراتۋرانى ساقتاۋ.
سونىمەن قاتار، قوسىمشا ساباقتار، ءۇي تاپسىرماسى نەمەسە ويىن-ساۋىق ءۇشىن تۇنگى ۇيقىنى قۇربان ەتۋگە بولمايدى. تۇراقتى ۇيقىنىڭ جەتىسپەۋشىلىگى زەيىننىڭ بۇزىلۋىنا جانە بالانىڭ وقۋ كۇنى ىشىندە جۇمىس قابىلەتىنىڭ تومەندەۋىنە اكەلۋى مۇمكىن.
«مەكتەپ رەجيمىنە ءقازىردىڭ وزىندە ورالعان ءجون — سوندا وقۋ باستالعاندا ەرتە تۇرۋ جانە ۋاقىتىندا ۇيىقتاۋ بالا ءۇشىن كۇرت سىناق بولمايدى»، — دەپ مالىمدەدى مينيسترلىكتە.