استاناداعى 23 جاستاعى جەدەل جاردەم فەلدشەرى ۇلدانا مىرزۋاننىڭ قازاسىنا قاتىستى قىلمىستىق ءىس سوتقا جەتتى. بۇل تۋرالى ءىىم حابارلادى، دەپ حابارلايدى infohub.kz سايتى.
سوتقا دەيىنگى تەرگەۋدى استانا پوليسيا دەپارتامەنتى قىلمىستىق كودەكستىڭ 254-بابىنىڭ 1-بولىگى — «مىندەتتەرگە ادال ەمەس قاراۋ» بويىنشا جۇرگىزدى.
«6 تامىزدا قىلمىستىق ءىستىڭ ماتەريالدارى سوتقا جىبەرىلدى»، — دەپ حابارلادى «كۋرسيۆكە» ءىىم.
تەرگەۋدىڭ باسقا مالىمەتتەرىن، ونىڭ ىشىندە ىسكە قاتىستى ادامدار تۋرالى اقپاراتتى ۆەدومستۆو بەرگەن جاۋاپتا ناقتىلامادى.
قايعىلى وقيعا 2025 جىلدىڭ 8 قاراشاسىندا بولدى. 23 جاستاعى جەدەل جاردەم فەلدشەرى استاناداعى شاقىرتۋعا بارعاندا، وعان عيماراتتىڭ كىرپىش قاپتاماسى مەن كونديسيونەردىڭ بەكىتپەسى قۇلادى. ۇلدانا اۋىر جاراقات الىپ، اۋرۋحاناعا جات قىزىلدى. دارىگەرلەر ونىڭ ءومىرى ءۇشىن ون كۇن كۇرەستى، الايدا 18 قاراشادا قىز قايتىس بولدى.
قايعىلى وقيعادان ءسال بۇرىن، 2025 جىلدىڭ 30 قىركۇيەگىندە ۇلدانا ادىلەت زەينەلگە تۇرمىسقا شىققان ەدى. 2026 جىلدىڭ شىلدە ايىنىڭ سوڭىندا الەۋمەتتىك جەلىلەردە جەسىر قايتا ۇيلەنگەنى بەلگىلى بولدى. بۇل قازنەتتە پىكىرتالاس تۋدىردى: پايدالانۋشىلاردىڭ ءبىر بولىگى ەر ادامدى جۇبايى قايتىس بولعاننان كەيىن بىرنەشە اي وتكەن سوڭ جاڭا نەكەگە تۇرعانى ءۇشىن سىنادى، ال باسقالارى ونىڭ جەكە ومىرىنە ارالاسپاۋعا شاقىردى.
كەيىن ۇلدانانىڭ اناسى بەينەۇندەۋ جاسادى. ول بۇرىنعى كۇيەۋ بالاسى مەن ونىڭ تۋىستارى قايتىس بولعان ايەلدىڭ وتباسىمەن بايلانىس ۇستاماعانىن جانە الداعى توي تۋرالى حابارلاماعانىن مالىمدەدى.