استانادا تۇرعىن ءۇيدىڭ قاسبەتى قۇلاپ، جەدەل جاردەم فەلدشەرى ۇلدانا مىرزۋاننىڭ ءومىرىن قيعان ءىس بويىنشا سوتتا زارداپ شەككەندەر ايىپتالۋشىعا — م ۇلىك يەلەرى بىرلەستىگىنىڭ (ميب) ءتورايىمى ساۋلە جۇبانيازوۆاعا ازاماتتىق تالاپ قويدى. تاراپتاردىڭ تالاپ سوماسى 45 ملن تەڭگەدەن استى، دەپ حابارلايدى infohub.kz سايتى.
بۇگىن سوتتا ەكى زارداپ شەگۋشىنىڭ — كاليەۆا مەن نۇرپەيىسوۆانىڭ وكىلدەرى مورالدىق جانە ماتەريالدىق زياندى ءوندىرۋ تۋرالى ازاماتتىق تالاپ قويۋ جونىندە ءوتىنىش ءبىلدىردى.
ماسەلەن، كاليەۆانىڭ ادۆوكاتى ساۋلە جۇبانيازوۆادان 10 ملن تەڭگە، سونداي-اق وكىل شىعىنى رەتىندە 500 مىڭ تەڭگە ءوندىرۋدى سۇرادى. ول سونداي-اق 53 مىڭ تەڭگە كولەمىندە ماتەريالدىق شىعىن بار ەكەنىن قوستى.
سونىمەن قاتار نۇرپەيىسوۆانىڭ ادۆوكاتى ونىڭ سەنىم بىلدىرۋشىسىنە ەستۋ اپپاراتى قاجەت بولاتىنىن جانە ونى بولاشاقتا اۋىستىرىپ وتىرۋ كەرەكتىگىن مالىمدەدى. ادۆوكات نۇرپەيىسوۆانى ازاماتتىق تالاپكەر دەپ تانۋدى سۇراپ، ماتەريالدىق شىعىن 322 554 تەڭگە، ال مورالدىق زيان 35 ملن تەڭگە دەپ باعالانعانىن ايتتى. سونداي-اق ول جۇبانيازوۆاعا ەستۋ اپپاراتىن جوسپارلى اۋىستىرۋ ءۇشىن ءار ەكى جىل سايىن 960 مىڭ تەڭگەدەن تولەۋ مىندەتىن جۇكتەۋدى سۇرادى.
ەسكە سالايىق، 2025 جىلعى 8 قاراشادا استانادا توعىز قاباتتى تۇرعىن ءۇيدىڭ قاسبەتىنەن سىرتقى كىرپىش قاپتاماسى مەن كونديسيونەر قۇلاعان بولاتىن. وقيعا ورنىندا جەدەل جاردەم فەلدشەرى زارداپ شەكتى — قىز قوقىس استىنان ەر ادامدى شىعارۋعا تىرىسقاندا، باسىنا 9-قاباتتان كونديسيونەر قۇلاعان. جاراقات العان قىزعا باس سۇيەگىن ترەپاناسيالاۋ جاسالدى.
18 قاراشادا فەلدشەردىڭ قازا تاپقانى بەلگىلى بولدى.
2026 جىلعى 18 تامىزدا استانادا ۇلدانا مىرزۋاننىڭ قازا تابۋىنا قاتىستى اشىق سوت پروسەسى باستالدى. ايىپتالۋشىلار قاتارىندا ءۇي ميب ءتورايىمى ساۋلە جۇبانيازوۆا وتىر.
وتىرىس بارىسىندا زارداپ شەككەندەر — وقيعادان كەيىن مۇگەدەكتىك العان گۇلنۇر كاليەۆا جانە قارىنداسىنىڭ قوڭىراۋىمەن كومەككە اسىققان اعاسى ءسوز سويلەدى.
سونداي-اق سوتتا ادامداردى قۇتقارعان تج قىزمەتكەرلەرىنىڭ اراسىندا جۇمىستان شىعارۋ مەن قىزمەتتەن تومەندەتۋ ورىن العانى انىقتالدى.
بۇعان قوسا، كۋا رەتىندە جۇبانيازوۆانىڭ الدىندا وسى قىزمەتتە ىستەگەن ءۇيدىڭ بۇرىنعى باسقارۋشىسى جاۋاپ بەردى. ونىڭ ايتۋىنشا، ۇيدەگى ماسەلەلەر 2020 جىلعا دەيىن دە بولعان.
سوتتا قاپتاماسى قۇلاعان ءۇيدىڭ اۋلاسىندا ورناتىلعان بەينەباقىلاۋ كامەرالارىنىڭ جازباسى دا كورسەتىلدى. ايىپتالۋشى ساۋلە جۇبانيازوۆانىڭ ءوزى ءۇيدىڭ ساراپتاماسىنان حاباردار بولعاندار پاتەرلەرىن ساتىپ جىبەرگەنىن ايتتى. ول سونداي-اق تەرگەۋشىنىڭ وعان كۇدىكتى مارتەبەسى بەرىلگەنىن قالاي حابارلاعانىن اڭگىمەلەدى.
سونىمەن قاتار ساراپشى باۋىرجان قازييەۆ قاسبەتتىڭ قۇلاۋىن سىرتتاي قاراۋ كەزىندە الدىن الا بولجاۋ مۇمكىن بولماعانىن مالىمدەدى. تاعى ءبىر ساراپشى — «استانا تەحنادزور» قىزمەتكەرى دميتري ۆوروبيەۆ قۇلاۋدىڭ سەبەبى قۇرىلىس ساپاسى ەكەنىن ايتتى. ول سونداي-اق تۇرعىندار مامانداردىڭ كومەگىنسىز قاسبەتتىڭ قۇلاۋ مۇمكىندىگىن ءبىلىپ، ونىڭ الدىن الا المايتىنىن ءتۇسىندىردى.