قازاقستان ۇلتتىق بانكى ازاماتتارعا ۇندەۋ جاساپ، الاياقتار سالەمدەمە، SMS-كودتار مەن eGov اتىنان قوڭىراۋ شالۋ ارقىلى اقشاعا قول جەتكىزەتىن تەلەفون الاياقتىعى سحەماسى تۋرالى ەسكەرتتى، دەپ حابارلايدى infohub.kz سايتى.
سحەما كۋرەرلىك نەمەسە پوشتا قىزمەتىنىڭ اتىنان قوڭىراۋ شالۋدان باستالادى: ادامعا سالەمدەمە كەلگەنى ايتىلىپ، جەتكىزۋدى راستاۋ ءۇشىن SMS-تەگى كودتى اتاۋدى سۇرايدى. الاياقتار كۋرەر كۇتىپ تۇرعانىن، كەزەكتەن ايىرىلىپ قالۋ ءقاۋپىن نەمەسە اڭگىمە بىتكەن سوڭ جەتكىزۋدى قايتا راسىمدەۋ قاجەتتىگىن سىلتاۋراتىپ، اڭگىمەلەسۋشىنى ادەيى اسىقتىرادى. وسىلايشا ولار جەدەلدىك سەزىمىن تۋدىرىپ، ادامعا SMS-حابارلامانىڭ مازمۇنىمەن مۇقيات تانىسۋعا مۇمكىندىك بەرمەيدى.
كودتى العان سوڭ الاياقتار كەلەسى كەزەڭگە كوشەدى. ازاماتقا ءوزىن سيفرلىق ۇكىمەتتىڭ (eGov) قىزمەتكەرى رەتىندە تانىستىرعان ادام قوڭىراۋ شالادى. اڭگىمە بارىسىندا ەسەپتىك جازبا بۇزىلعانى، سونداي-اق دەربەس دەرەكتەردىڭ تاراپ كەتۋى نەمەسە كوشىرىلۋى مۇمكىندىگى تۋرالى ايتىلادى. سەنىمدىرەك بولۋ ءۇشىن الاياقتار ازاماتتى قورعاۋ ماقساتىندا «ستوپ-كرەديت» قىزمەتى قوسىلعانىن، ال جاعداي قۇقىق قورعاۋ ورگاندارىنىڭ نەمەسە «ۇلتتىق بانكتىڭ قاۋىپسىزدىك قىزمەتىنىڭ» باقىلاۋىندا ەكەنىن العا تارتۋى مۇمكىن. كەيىن قوڭىراۋ سحەمانىڭ باسقا قاتىسۋشىسىنا قوسىلۋى ىقتيمال. مۇنداي ارەكەتتەردىڭ تۇپكى ماقساتى — ازاماتتاردىڭ اقشاسىنا قول جەتكىزۋ.
مۇنداي سحەمالاردىڭ ءتان بەلگىسى — پسيحولوگيالىق قىسىم. الاياقتار تەلەفون اڭگىمەسىن ۇزبەۋدى، بولىپ جاتقان جاعدايدى ءۇشىنشى تۇلعالارعا ايتپاۋدى جانە اڭگىمەنىڭ قۇپيالىلىعىن ساقتاۋدى تالاپ ەتۋى مۇمكىن. كەيبىر جاعدايدا ازاماتتاردى اقپاراتتى جاريا ەتكەنى ءۇشىن قىلمىستىق جاۋاپكەرشىلىكپەن قورقىتىپ، نە اڭگىمەنى توقتاتۋ اقشا مەن دەربەس دەرەكتەردى قورعاۋعا باعىتتالعان راسىمدەردىڭ كۇشىن جوياتىنىن العا تارتادى. مۇنداي ارەكەتتەر ازاماتتىڭ جاقىندارىنان، بانكتەن نە قۇقىق قورعاۋ ورگاندارىنان كەڭەس پەن كومەك سۇراۋ مۇمكىندىگىن شەكتەۋگە باعىتتالعان.
ۇلتتىق بانك SMS-حابارلامانى جىبەرۋشىنى مۇقيات وقىپ، تەكسەرۋدى، SMS-تەگى كودتاردى ەشقاشان ءۇشىنشى تۇلعالارعا ايتپاۋدى، ال كۇدىكتى قوڭىراۋ تۇسكەن جاعدايدا اڭگىمەنى دەرەۋ توقتاتىپ، ۇيىمنىڭ رەسمي تەلەفون نومىرىنە قايتا قوڭىراۋ شالۋدى ۇسىنادى.
«ۇلتتىق بانك قىزمەتكەرلەرى اۋديو- جانە بەينەقوڭىراۋ شالمايتىنىن، جەكە تۇلعالاردىڭ شوتتارىنا قىزمەت كورسەتپەيتىنىن، اقشانى پايلىق ينۆەستيسيالىق قورلارعا جانە وزگە دە قارجى ونىمدەرىنە سالۋدى ۇسىنبايتىنىن، اقشانى ساقتاندىرۋمەن اينالىسپايتىنىن، بانك كارتالارىنىڭ قۇپياسوزدەرى مەن دەرەكتەمەلەرىن سۇرامايتىنىن، سونداي-اق حالىقپەن اقشالاي ەسەپ ايىرىسپايتىنىن ەسكە سالامىز»، — دەدى ۇلتتىق بانكتە.
الاياقتىققا تاپ بولعان جاعدايدا قازاقستاندىقتارعا قۇقىق قورعاۋ ورگاندارىنا ارىزبەن جۇگىنۋگە كەڭەس بەرىلەدى. كەڭەستى ۇلتتىق بانكتىڭ 1477 ءنومىرى بويىنشا بايلانىس ورتالىعىنان الۋعا بولادى.